Қазақстан Республикасы Еңбек және халықты әлеуметтік қорғау министрлігі (ЕХӘҚМ) кезекті маңызды статистиканы жариялады. Мысалы, 2025 жылдың басынан бері көпбалалы отбасылар мен марапатталған аналарға жәрдемақы ретінде 253 миллиард теңгеден астам қаражат төленгені белгілі болды.
Министрлік 12 маусымда таратқан ресми мәліметке сәйкес, 2025 жылдың басынан бері көпбалалы отбасылар мен марапатталған аналарға мемлекеттік жәрдемақы түрінде 855,9 мың адамға жалпы сомасы 253,4 миллиард теңге көлемінде төлем жасалған. Атап айтқанда:
• көпбалалы отбасыларға 613,7 мың отбасыға 221 млрд теңге төленген;
• марапатталған аналарға 242,2 мың адамға 32,4 млрд теңге бөлінген.
Сондай-ақ, 2025 жылдың мамыр айында аталған төлемдермен 865,3 мың адам қамтылып, жалпы сомасы 51,5 млрд теңге болған. Оның ішінде:
• көпбалалы отбасыларға 622,3 мың отбасыға 45 млрд теңге төленген;
• марапатталған аналарға 243 мың адамға 6,5 млрд теңге бөлінген.
Мамандардың айтуынша, көпбалалы отбасыларға арналған жәрдемақыны төрт және одан да көп бірге тұратын кәмелетке толмаған балалары немесе күндізгі бөлімде оқитын, 23 жасқа дейінгі студент балалары бар отбасылар табысына қарамастан ала алады.
2025 жылы көпбалалы отбасыларға төленетін жәрдемақы мөлшері бала санына қарай сараланған:
• 4 балаға – 16,03 АЕК, яғни 63 030 теңге;
• 5 балаға – 20,04 АЕК, яғни 78 798 теңге;
• 6 балаға – 24,05 АЕК, яғни 94 565 теңге;
• 7 балаға – 28,06 АЕК, яғни 110 332 теңге;
• 8 және одан да көп балаға – әр балаға 4 АЕК немесе 15 728 теңге.
Сонымен қатар, марапатталған аналарға жәрдемақы «Алтын алқа», «Күміс алқа» алқаларымен марапатталған немесе бұған дейін «Батыр ана» атағын алған, сондай-ақ «Ана даңқы» I және II дәрежелі ордендерінің иелеріне тағайындалады.
Марапатталған аналарға арналған ай сайынғы жәрдемақы көлемі:
• «Күміс алқа» иелеріне – 6,40 АЕК немесе 25 165 теңге;
• «Алтын алқа», «Батыр ана» атағы немесе «Ана даңқы» I және II дәрежелі ордендерінің иелеріне – 7,40 АЕК немесе 29 097 теңге.
