30 тамызда аталып өтетін Конституция күніне орай Шымкентте әлеуметтік осал санаттағы балаларға біржолғы әлеуметтік көмек көрсетіледі.
Мүгедектігі бар балаларға 5 АЕК (19 660 теңге) көлемінде төлем төленеді. «Азаматтарға арналған үкімет» мемлекеттік корпорациясының қалалық филиалының мәліметінше, тізімде 8 323 бала бар.
Жетім балалар мен ата-анасының қамқорлығынсыз қалған балаларға 20 АЕК (78 640 теңге) көлемінде жәрдемақы төленеді. Білім басқармасы ұсынған тізімде 673 бала бар.
Шымкентте мұндай қолдау түрлі мерекелер қарсаңында көрсетілуде. Өткен жылы біржолғы төлемдер Наурыз мерекесіне, биыл Конституция күніне орайластырылды.
Жәрдемақы алу үшін мемлекеттік органдарға хабарласудың қажеті жоқ. Аударым автоматты түрде жүзеге асырылады:
мүгедектігі бар балалар үшін – аналарының әлеуметтік шоттарына;
жетім балалар үшін – заңды өкілдерінің шотына.
Айта кету керек, біржолғы көмек Шымкент қаласында мемлекеттік зейнетақы төлемдері базасында тіркелген жағдайда ғана төленеді. Егер отбасы басқа аймаққа көшкен немесе уақытша тіркеуді өзгерткен болса, есептеу жүргізілмейді. Сондықтан ерекше қажеттіліктері бар балалардың ата-аналарына тіркеудің өзектілігін тексеру ұсынылады.
