Астанадағы Ұлттық қауіпсіздік комитетінің (ҰҚК) бұрынғы төрағасы, бұрынғы Премьер-Министр Карим Мәсімовке тиесілі зәулім сарай Оқу-ағарту министрлігіне берілді.
«Қайтарылған активтерді басқару компаниясының» (ҚАБК) баспасөз қызметі 2025 жылғы 5 қыркүйекте атап өтті:
«Мемлекеттік мүлік және жекешелендіру комитетінің бұйрығына сәйкес тұрғын үй ресми түрде ҚР Оқу-ағарту министрлігіне қарасты «Арнайы және инклюзивті білім беруді дамытудың ұлттық ғылыми-практикалық орталығы» республикалық мемлекеттік мекемесінің балансына берілді».
Өз кезегінде Оқу-ағарту министрлігінің ресми өкілі Мереке Амангелдіқызы бұл шешім ерекше білім беру қажеттіліктері бар балалар санының артуымен байланысты екенін түсіндірді.
Оның айтуынша, Қазақстан бойынша арнайы және инклюзивті білім беру ұйымдарының желісін кеңейту туралы шешім қабылданған.
«Басты орталық Алматы қаласындағы «Арнайы және инклюзивті білім беруді дамытудың ұлттық ғылыми-практикалық орталығында» шоғырландырылып, Астананы қоса алғанда барлық өңірлерде филиалдар ашылады», – деді министрліктің баспасөз қызметі.
Ведомство мұндай тәсіл бірыңғай ғылыми-әдістемелік базаны қамтамасыз ететінін, мамандарға, ата-аналарға және балаларға қолайлы жағдай жасайтынын, сондай-ақ арнайы білім беру ұйымдарының жұмыс тиімділігін арттыруға мүмкіндік беретінін нақтылады.
«Инклюзивті және арнайы білім беруді дамыту – мемлекеттік саясаттың негізгі басымдықтарының бірі. Әрбір бала үшін тең жағдай жасау мақсатында министрлік жүйелі шараларды жүзеге асыруда. Қазіргі уақытта ұлттық деңгейде «Ерекше білім беру қажеттіліктері бар балаларды кешенді қолдау туралы» заң жобасы дайындалуда».
Бұл сарайды алғаш рет 2025 жылғы 25 ақпанда сатуға тырысқан. Бағаны көтеру бойынша сауда 13 мамырда 1,68 млрд теңге бастапқы бағасымен өтуі тиіс еді, ал кепілдік жарнасы 118 млн теңгені құраған.
Алайда сәуір айында үйдің аукционнан алынып, әлеуметтік мақсаттарға пайдаланылу үшін астана әкімдігінің балансына берілетіні белгілі болды.
2023 жылғы 24 сәуірде Карим Мәсімов 18 жылға бас бостандығынан айыру жазасына кесілді. Ол мүлкін тәркілеумен және мемлекеттік қызметте лауазым атқару құқығынан өмір бойына айырумен сотталды. Сот оны мемлекетке опасыздық жасау, билікті күшпен басып алу және лауазымдық өкілеттігін асыра пайдалану қылмыстары бойынша кінәлі деп таныды.
2024 жылғы 14 қарашада оған қатысты жаңа қылмыстық істер қозғалғаны белгілі болды. ҰҚК деректеріне сәйкес, ол ақшаны жымқыру және аса ірі көлемде пара алу бойынша күдікке ілінген.
