Талғарда «мүгедектігі бар балалар үйінің» қызметкерлері наразылыққа шықты. Олар жұмыс кестесінің өзгеруіне және жалақының азаюына шағымданды.
Коммуналдық мемлекеттік мекеме – «Талғар арнаулы әлеуметтік қызмет көрсету орталығы «Аяла» қызметкерлерінің айтуынша, бес жылдан астам уақыт бойы олар тәулігіне бір жұмыс істеп, екі күн демалатын графикпен 300 мың теңге жалақы алатын.
Алайда жақында қызметкерлерге жаңа график енгізілген: алғашқы тәулік – күндіз жұмыс, екінші тәулік – түнгі ауысым, үшінші тәулік – демалыс. Бұл жағдайда жалақы 243 мың теңгені құрады.
Наразылық білдірген қызметкерлер зейнетақы аударымдарындағы заңбұзушылықтар туралы айтып, аудит жүргізуді талап етті.
Ал мекеме директоры өз кезегінде бұл шешімнің еңбек инспекторының ескертпелеріне байланысты қабылданғанын түсіндірді. Ол өзін жаңа басшы екенін айтып, зейнетақы жарналарының толық түспеуі мен қызметкерлер табысының азаюы өзі үшін де күтпеген жағдай болғанын мәлімдеді. Сондай-ақ бухгалтериямен бұл мәселені анықтап, реттеуге уәде берді.
