Астаналық сурдо-балуандар Жапонияда өткен турнирдің алғашқы күнінде екі медаль жеңіп алды
Жапония астанасы Токиода өтетін XXV жазғы Сурдлимпиада ойындарында сурдо-дзюдодан жарыс басталды. Елордалық екі спортшы сәтті жарысып, Қазақстанның қоржынына екі медаль алып келді.
70 кг салмақ дәрежесінде астаналық спортшы Амина Файзуллина финалда украиналық Марина Похореловаға қарсы шықты, айқын басымдықпен жеңіп, Сурдлимпиада чемпионы атанды. Бұл 18 жастағы Аминаның халықаралық деңгейдегі алғашқы жарқын жеңісі.
Ал +100 кг ауыр салмақ дәрежесінде астаналық спортшы Сабыржан Хапизов украиналық Володимир Маклаковты жеңіп, Сурдлимпиаданың екі дүркін қола жүлдегері атанды.
Төрт жылда бір өтетін, есту қабілеті бұзылған спортшыларға арналған бұл беделді турнир биыл ерекше тарихи мәнге ие — сурдлимпиадалық қозғалыстың 100 жылдығымен тұспа-тұс келді. Жарысқа 81 елден шамамен 3000 спортшы қатысып, 21 спорт түрі бойынша 209 дисциплинада бақ сынауда.
Қазақстанның ұлттық құрамасы биыл 78 спортшымен қатысып, 8 спорт түрінде ел намысын қорғап жатыр. Олардың қатарында Астанадан барған 5 спортшы бар, олар 4 түрлі спорт түрінде өнер көрсетуде.
