Қазақстанда тегін дәрі-дәрмек беру тәртібі өзгереді
2026 жылғы 18 мамырда Денсаулық сақтау вице-министрі Тимур Мұратов 2027 жылға қарай Қазақстанда тегін дәрі-дәрмек беру тәсілін өзгерту жоспарланып отырғанын мәлімдеді.
БАҚ өкілдері «СК-Фармация» шығындарының науқастарға емдеу сапасы тұрғысынан тиімділігіне талдау жасалды ма және дәрі-дәрмек сатып алу кезінде басты назар препараттың бағасы мен өндірушісіне ғана емес, науқастардың қажеттілігіне де аударылса, шығындарды қаншалықты қысқартуға болатынын сұрады.
«Өте орынды сұрақ қойдыңыздар. Қазақстанда 3,4 миллион адам амбулаториялық деңгейде тегін дәрі-дәрмекпен қамтамасыз етіледі. Бұл көрсеткіш бойынша біз көптеген елдерден алдамыз. Бірақ мәселе — барлық науқастар берілген дәрілерді толық пайдаланбайды. Сондықтан биылдан бастап біз дербестендірілген өтінімдер жүйесіне көшеміз. Яғни науқастарға емдеуші дәрігер нақты тағайындаған препараттар ғана беріледі. Қазір осы мақсатта «СК-Фармация», медициналық ұйымдар мен дәрігерлердің қатысуымен цифрлық платформа мен мониторинг жүйесін енгізу бойынша ауқымды жұмыс жүргізіліп жатыр», – деді Тимур Мұратов.
Оның айтуынша, жаңа жүйеге көшу осы жылдың соңына дейін аяқталады деп жоспарланып отыр. Ал 2027 жылдан бастап науқастар дәрігер тағайындаған қажетті дәрілерді ала алады.
Журналистер жаңа жүйенің іс жүзінде қалай жұмыс істейтінін және дәрігер тағайындағаннан кейін науқастар қажетті препаратты сатып алу мен жеткізу рәсімдеріне байланысты бір апта немесе бір ай күтуге мәжбүр болмай ма деген сауал қойды.
«Мұнда басты мәселе — үздіксіз қамтамасыз ету. Қазір жиналатын өтінімдер дәрігердің созылмалы ауруы бар нақты науқасқа тағайындаған еміне негізделеді. Амбулаториялық дәрі-дәрмекпен қамтамасыз ету созылмалы аурулары бар науқастарға арналғанын түсіну керек. Олардың қатарында жүрек-қан тамырлары аурулары, артериялық гипертония, жүректің ишемиялық ауруы, қант диабеті және басқа да дерттер бар. Егер мұндай науқастар дәрілерді тұрақты қабылдамаса, асқынулар пайда болып, олар стационарға түсуі мүмкін. Сондықтан әр пациентке оның қатар жүретін ауруларын, салмағын, бойын және жеке ерекшеліктерін ескере отырып, жеке терапия тағайындауға болады. Сәйкесінше, жыл бойына қажетті дәрілер алдын ала сатып алынып, науқастарға жеткізіліп отырады. Дәрігер қажетті дозаны өзі белгілейді», – деп түсіндірді ол.
Бұған дейін Таяу Шығыстағы қақтығысқа байланысты дәрі-дәрмек тапшылығы болуы мүмкін екені ескертілген болатын.
