Бюджеттен қаражат бөлінгеніне қарамастан, әлеуметтік осал санаттағы азаматтарға арналған тұрғын үйлер әлі күнге дейін пайдалануға берілмеді.
Ақмола облысында Көкшетау қаласында көпқабатты тұрғын үйлер салуға бөлінген қаражаттың жымқырылуы мүмкін деген күдік бойынша тергеу жүргізілуде.
Тергеу нұсқасына сәйкес, мердігер ұйым 211 миллион теңгеден астам қаражат алғанымен, нысандар әлі күнге дейін пайдалануға берілмеген.
Ақмола облысы бойынша Қаржылық мониторинг агенттігі департаментінің мәліметінше, тергеу прокуратураның үйлестіруімен жүргізілуде.
Ведомство деректеріне сәйкес, 2021 жылғы желтоқсанда Көкшетау қаласының құрылыс бөлімі әлеуметтік осал топтарға арналған тұрғын үйлер салу жөнінде «Айдана-ИК» ЖШС-мен келісімшарт жасаған.
Жобаның жалпы құны 1 миллиард теңгеден асқан.
Тергеу мәліметінше, аванстық төлемдерді алу үшін компания азаматтық-құқықтық жауапкершілікті сақтандыру туралы жалған шарттарды ұсынған.
Осыдан кейін мердігерге бюджет қаражаты аударылған.
Әңгіме 211 миллион теңге көлеміндегі қаржы туралы болып отыр.
Алайда Қаржылық мониторинг агенттігінің мәліметіне сәйкес, құрылыс жұмыстары толық көлемде орындалмаған.
Соның салдарынан тұрғын үйлер пайдалануға берілмеген.
Осылайша, мемлекеттік қаражат бөлінген жоба аяқталмай қалып, жаңа баспанаға үміт артқан азаматтар күтуін жалғастыруға мәжбүр болған.
Тергеу нұсқасы бойынша, алынған қаражат мақсатсыз жұмсалған.
Қаржының бір бөлігі жеке қажеттіліктерге жұмсалса, тағы бір бөлігі мердігер ұйымдармен есеп айырысуға бағытталған, ал қалған бөлігі қолма-қол ақшаға айналдырылған.
«Күдікті қамауға алынды», – деп хабарлады Қаржылық мониторинг агенттігі.
Қазіргі уақытта тергеу жалғасуда.
Ведомствоның мәлімдеуінше, ҚР Қылмыстық-процестік кодексінің 201-бабына сәйкес өзге ақпарат жария етуге жатпайды.
Бұл оқиға тек бюджет қаражатына қатысты мәселе ғана емес.
Әңгіме әлеуметтік осал санаттағы азаматтарға арналып салынған тұрғын үйлер туралы болып отыр. Сондықтан мұндай істер қоғамда үлкен резонанс тудырады. Өйткені әрбір аяқталмаған пәтердің артында жылдар бойы баспана кезегін күтіп жүрген нақты адамдардың тағдыры тұр.
