Мүгедектігі бар қызы үшін әкесі пәтерінен көшеге шығатын жеке лифт жасады
Қазақстандық Самиголла Ғаниев ДЦП диагнозы қойылған қызы үшін екінші қабаттағы пәтерінен көшеге шығуға мүмкіндік беретін жеке лифт жасады.
Енді 33 жастағы Гүлберген күн сайын сыртқа шыға алады. Ол бес баланың үлкені.
Заманауи көтергіш бейнекамерамен, жарықтандыру жүйесімен және тіпті кодты құлыппен жабдықталған. Лифт 250 келіге дейін жүк көтере алады, ал бірінші қабатқа дейінгі қашықтық 3 метр 80 сантиметрді құрайды.
Бәрі қызының анасымен кезекті серуенінен кейін басталған.
«Әйелім қызымызды екінші қабатқа көтеріп келе жатқанда, белі ауырып қалды. Содан қандай да бір көтергіш ойлап табуды сұрады. Қазақстанның түкпір-түкпірінен іздей бастадым. Рудный қаласына шықтым. Олар бастапқыда мұндай құрылғыларды жасамайтындарын айтты. Кейін қайта қоңырау шалып, тапсырыс бойынша жасап бере алатындарын жеткізді», – деп көпбалалы әке өзінің басынан өткен оқиғасымен бөлісті.
Көтергішті жасауға, тасымалдауға және орнатуға бір айға жуық уақыт пен шамамен 4 млн теңге жұмсалған. Алайда қамқор әке мұнымен тоқтап қалмады. Гүлбергенге жайлы болу үшін ол өз бөлмесінің тұсынан балкон да жасап берді.
2026 жылғы 11 тамызда Еңбек және халықты әлеуметтік қорғау министрлігінде Қазақстанда мүгедектік қалай және қандай мерзімге белгіленетіні түсіндірілді.
