Елордадағы «Арғымақ» ат спорты және ұлттық спорт түрлері клубында қала тұрғындарына иппотерапия бойынша сабақтар өткізіледі. 2026 жылдың басынан бері бұл сабақтарға 586 адам қатысты.
«Арғымақ» клубы иппотерапия бойынша сабақтарды 2023 жылдың қазан айынан бастап өткізіп келеді. Сол кезде жоба пилоттық режимде іске қосылған болатын. Алғашқы серіктестердің бірі ерекше қажеттіліктері бар балаларды оңалту тәжірибесі бар «Жансая» әлеуметтік қызмет көрсету орталығы болды.
Қазіргі таңда сабақтарға қала тұрғындарымен қатар «Жансая», «Шарапат» және «Нұрлы Жүрек» әлеуметтік қызмет көрсету орталықтарының қызмет алушылары қатысады.
Сабақтар дүйсенбі, сәрсенбі және жұма күндері үш ауысымда өткізіледі. Клубқа арнайы дайындықтан өткен жеті жылқы бекітілген.
2025 жылы иппотерапия бойынша сабақтарға ерекше қажеттіліктері бар 2 470 бала қатысты.
Клубта мамандардың біліктілігін арттыруға ерекше көңіл бөлінеді. Қызметкерлер үшін ерекше қажеттіліктері бар балаларды иппотерапия әдісі арқылы оңалтуға арналған бес оқыту семинары және үш практикалық сабақ ұйымдастырылды. Сонымен қатар қызметкерлер тиісті сертификаттаудан өтеді.
Сабақтарға жазылуға birge.astana.kz порталы арқылы болады. Курс басталар алдында әр бала бастапқы тексеруден өтеді. Оның нәтижелері бойынша мамандар жеке оңалту жоспары мен сабаққа қатысу кестесін әзірлейді.
