Петропавлда 15 380 адам баспана кезегінде тұр. Оның 1810-ы жетім және ата-анасының қамқорлығынсыз қалған балалар.
Әлеуметтік желіде баспана кезегінде тұрған азаматтардың арыз-шағымдары кезең-кезеңімен түсіп жатады. Кейбіреулер үшін баспананы күту 10 немесе одан да көп жылға созылды. Жақында ғана жас келіншек жетім күйеуінің баспана алу жағдайын реттеуді сұрап өтініш жазды. Ол 13 жылдан бері үй кезегінде тұрғанын және баспана алу тізімінде 29-шы орында тұрғанын айтады. Оларға былтыр пәтер берілуі керек еді, бірақ берілмеді.
Жақында Солтүстік Қазақстан облысының әкімі Айдарбек Сапаров өткен брифингте жетім балалардың баспана алу жағдайына қатысты пікір білдірді. Аймақ басшысы өткен жылы жалға берілетін және коммуналдық тұрғын үйлер пайдалануға берілмей қалғанын атап өтті. Биыл «Береке» шағын ауданында 100 пәтерлік алты үй пайдалануға берілсе, ондағы пәтерлерді 120 жетім бала алады.
Петропавл қаласының әкімдігінде мемлекеттік тұрғын үй қорынан тұрғын үйді бөлу тетігі түсіндірілді.
«Тіркелген азаматтарға тұрғын үй барлық қажетті құжаттармен өтініш берген сәттен бастап тізімдермен белгіленген кезектілік тәртібімен беріледі. Тізімге енгізілген азаматтардың құқықтары тең деп танылады. Кезектілік үйлердің құрылысы мен тапсырылуына қарай ілгерілейді. Салынған тұрғын үйлердің жалпы санынан пәтерлер келесідей пайызбен бөлінген: 20% — жетім балалар, ата-анасының қамқорлығынсыз қалған балалар, 20% — көп балалы аналар, «Алтын алқа», «Күміс алқа» алқаларымен марапатталған немесе бұрын «Батыр ана» атағын алған, 1 және 2-дәрежелі «Ана даңқы» ордендерімен марапатталған, көп балалы отбасылар, бір тұрғын үйден бір пәтер «басқа мемлекеттің аумағындағы ұрыс қимылдарына қатысушылар (жауынгер-интернационалистер) санаты бойынша кезекте тұрған азаматтарға беріледі», — деп хабарлады қала әкімдігі.
Петропавлда қазір 15 380 адам мемлекеттік тұрғын үй қорынан баспана алу кезегінде тұр. Оның 360-ы көп балалы отбасылар, 1810-ы жетім және ата-анасының қамқорлығынсыз қалғандар, 5820-ы халықтың әлеуметтік осал топтары, 7231-і мемлекеттік қызметшілер, бюджеттік ұйымдардың қызметкерлері және 164-і жалғыз баспанасы апатты деп танылған азаматтар.
Жыл басында Сыбайлас жемқорлыққа қарсы қызмет Петропавл қаласы әкімдігінің тұрғын үй-коммуналдық шаруашылық бөлімінде сыбайлас жемқорлық тәуекелдеріне сыртқы талдау жүргізу барысында көптеген заң бұзушылықтарды анықтады. Соның ішінде жетім балаларға баспана бөлу. Антикорда олар салынған пәтерлердің жалпы санының 20 пайызын емес, тек 11 пайызын ғана бергендерін атап өтті. Сондай-ақ, жетім балаларды тұрғын үйге мұқтаждар тізімінен себепсіз шығарудың 1360 фактісі анықталды.
