Келесі жылдан бастап әрбір кәмелетке толмаған қазақстандық жеке шотына шамамен 150 доллардан түседі. «Балаларға арналған ұлттық қор» бағдарламасы бойынша төлемдерді қаңтардың аяғында немесе ақпан айының басында жүзеге асыру жоспарлануда. Жас қазақстандықтар кәмелеттік жасқа толған соң бұл қаражатты тұрмыс жағдайын жақсартуға немесе оқу ақысын төлеуге жұмсай алады.
Мемлекет басшысының бір жыл бұрын Қазақстан халқына жолдауында бастамашылық еткен «Балаларға арналған ұлттық қор» жобасы бойынша 6 миллион 700 мың қазақстандық қамтылады. Барлық балаларға ұлттық қордың инвестициялық кірісінің жартысы бөлінеді.
Қаржы министрлігі бүгінде заң жобасы әзірленіп, заңға сәйкес аталған бастама жүзеге асырылуы тиіс деп отыр. Жоба Парламент Мәжілісінің қарауында. Одан кейін ол Сенатқа жіберіліп, оған мемлекет басшысы қол қояды. Дайындық жұмыстарын жыл соңына дейін аяқтау жоспарлануда, ал алғашқы қаражат 2024 жылдың қаңтар айының соңы-ақпан айының басында беріледі. Осылайша балалардың шоттарына жыл сайын шамамен 150-160 доллар түседі, бірақ түсетін сома одан да көп болуы мүмкін.
«Кәмелеттік жасқа толғанға дейін бұл қаражат шартты түрде ұлттық қорда болады, ұлттық қорда жасалатын барлық операцияларға жұмсалады. Бұл жерде біз инвестициялық кірістің ұлғаюын және төленетін соманың ұлғаюын қарастырамыз. Негізі бұл қаражатты бала кәмелетке толған кезде алуға болады», – дейді ҚР Қаржы министрлігі бюджеттік несиелеу департаментінің директоры Айбол Арғынғазинов.
Электрондық үкімет порталы арқылы ЖСН бойынша төлемдер сомасын онлайн қарауға болады. Бағдарлама операторы БЖЗҚ болады. Экономист мамандардың айтуынша, мұндай бағдарламалар басқа елдерде де табысты жұмыс істеп жатыр. Бұл қаражат жастарды қолдап, компанияның жауапкершілігіне де оң әсер етеді.
«Қоғам олардың жұмысына жай ғана емес, компанияның кірістілігін арттыру тұрғысынан, кімге тағайындалатынына көбірек көңіл бөлетін болады. Бұл кеңінен талқыланады, өйткені қанша ақша түсетіні мемлекеттік компаниялардың осы тиімділігіне байланысты болады», – дейді экономист Арман Байғанов.
18 жасқа дейінгі бала үшін болжанған жинақ сомасы шамамен 3,5 мың долларды құрауы мүмкін. Кәмелетке толған кезде қаражат баланың меншігінде болады және оны біздің елде баспана сатып алуға, сонымен қатар осында немесе шетелде оқу ақысын төлеуге жұмсауға болады. Бұл ретте қаражат 10 жыл ішінде игерілмесе, онда ол азаматтың зейнетақы шотына аударылады.
