Үкімет ең төменгі жалақыны кезең-кезеңімен көтеруді жалғастырады. Бұл туралы Қасым-Жомарт Тоқаев мәлімдеді.
⠀⠀«Үкімет ең төменгі жалақы деңгейін кезең-кезеңімен көтеруді жалғастырады. Азаматтардың табысын арттыру мақсатында 2024 жылдың 1 қаңтарынан бастап ең төменгі жалақыны 85 мың теңгеге дейін көтеруді тапсырамын. Осылайша біз үш жылда ең төменгі жалақыны екі есеге арттырдық.
⠀Бұл шара 1 миллион 800 мыңға жуық азаматтың, оның ішінде 350 мың мемлекеттік қызметкердің әл-ауқатына оң әсер етеді. Жалпы еңбек нарығын жан-жақты дамыту үшін Үкімет 2030 жылға дейін есептелген Кешенді жоспарды тезірек бекітуі қажет.
⠀Жаңа экономикалық саясаттың қағидаттары мен басымдықтарын нақты айқындаумен қатар, жоспарланған реформалардың сапалы әрі толық жүзеге асырылуы да аса маңызды. Ал бұл процесс мемлекеттік қызметшілердің құзыретіне, жауапкершілігіне және саяси ерік-жігеріне тікелей байланысты», — деді Тоқаев.
⠀Қазақстан Республикасының Президенті жыл сайынғы Қазақстан халқына жолдауын жариялайды.
