Қазақстанда бағасы 1 АЕК-тен төмен дәрілік заттар мемлекеттік реттеу жүйесінен шығарылады
Денсаулық сақтау министрлігі дәрілік заттардың бағасын кезең-кезеңімен реттеу аясында құны 1 АЕК-ке дейінгі, яғни 4 325 теңгені құрайтын дәрілік заттарды мемлекеттік баға реттеуінен шығарады.
Бұл шара бәсекелестікті дамытуға, дәрілік заттардың ассортиментін кеңейтуге және олардың халық үшін қолжетімділігін арттыруға бағытталған. Нәтижесінде 1 200-ден астам атаудағы дәрілік заттың бағасы нарықтық тетіктер арқылы қалыптастырылатын болады.
Бағасы төмен дәрілік заттарды мемлекеттік баға реттеуінен шығару нарық қатысушыларына сұраныс пен ұсынысты ескере отырып, бағаны дербес қалыптастыруға мүмкіндік береді.
Бағаларды кезең-кезеңімен ырықтандыру аясында Қазақстан Республикасы Денсаулық сақтау министрінің 2026 жылғы 4 қыркүйектегі №105 бұйрығымен көтерме және бөлшек саудада өткізу үшін бағасы реттелуге жататын дәрілік заттардың тізбесіне өзгерістер енгізілді.
Жаңартылған тізбеге сәйкес мемлекеттік баға реттеуіне жататын позициялар саны 3 039-дан 1 827-ге дейін қысқартылды.
Осылайша, мемлекеттік реттеу неғұрлым нысаналы сипатқа ие болып, халық үшін қолжетімділігін қосымша қорғауды қажет ететін дәрілік заттарға шоғырланады.
Дәрілік заттардың бір бөлігін нарықтық баға белгілеуге көшіру фармацевтикалық нарық мониторингін күшейтумен қатар жүреді.
Денсаулық сақтау министрлігі Қазақстан Республикасының Бәсекелестікті қорғау және дамыту агенттігімен бірлесіп, бағаларды мониторингтеу және бақылау тетіктерін, оның ішінде тауарларды таңбалау және қадағалау ақпараттық жүйесін пайдалану арқылы жетілдіру жұмыстарын жүргізуде.
Цифрлық құралдар дәрілік заттардың қозғалысын қадағалауға және олардың айналымының әртүрлі кезеңдеріндегі нақты бағаларды талдауға мүмкіндік береді.
Бұл бағаның негізсіз өсуінің ықтимал белгілерін уақтылы анықтауға мүмкіндік береді.
2024 жылғы шілдеде міндетті таңбалау енгізілген сәттен бастап жүйе арқылы шамамен 1,1 млрд қаптама дәрілік зат өткізілді.
Денсаулық сақтау министрлігі дәрілік заттардың қазақстандықтар үшін баға тұрғысынан қолжетімділігін қамтамасыз ету бағытындағы жұмысты жалғастырады.
Дәрілік заттарға белгіленген шекті бөлшек сауда бағаларының асып кеткені анықталған жағдайда, DariKZ мобильді қосымшасы арқылы растайтын материалдарды (тауарлық чек пен дәрілік заттың қаптамасын) қоса тіркеп, Қазақстан Республикасы Денсаулық сақтау министрлігінің Медициналық және фармацевтикалық бақылау комитетінің аумақтық департаменттеріне өтініш жолдауға болады.
