Талдықорған қаласының мектеп оқушысы Гарвардта оқу грантының иегері атанған. Әлемге танымал беделді оқу орнында Сезім Ертанатов заманауи компьютерлік технологияларды зерттемек. Назарбаев зияткерлік мектебінің 12 сынып оқушысы бірнеше жылдан бері бағдарламалауды меңгеруде, сонымен қатар түрлі web-сайттар жасап жүр. Аталмыш беделді оқу орнында білім алуға әлем бойынша 55 мың адам өтінім білдірген. Қатаң сынақ және жоғары бәсекелестік нәтижесінде қазақстандық оқушы мың жарым адамның ішінен озып шыққан.
Сезім Ертанатов, Талдықорған қаласы НЗМ 12 сынып оқушысы:
— Болашақтағы жоспарым — осы Гарвард университетін сәтті тәмамдап, кемел білім, бағалы тәжірибе жинақтау. Егер жолым болып жатса магистратураға да түссем деп жоспарлап жүрмін. Сосын міндетті түрде Қазақстанға қайтып оралу.
Источник: Хабар 24
