Мекеме директоры 1000 АЕК көлемінде айыппұл төлеуі тиіс.
Алматы қаласының Алмалы аудандық соты тәрбиеленушілердің 60 млн теңгеден астам ақшаны иеленгені үшін облыстық балалар үйінің педагогын 7 жылға бас бостандығынан айырды. Бұл туралы бала құқықтары жөніндегі уәкіл Аружан Саин өзінің Facebook-тегі парақшасында хабарлады.
Сот әлеуметтік педагог Маржан Мұстафина бірнеше жыл бойы Алматы облыстық Бағанашылдағы №1 балалар үйінің тәрбиеленушілерінің шотынан ақша алғанын анықтады. Бұл асыраушысынан айырылғандар және мүгедектігі бар жандардың жәрдемақылары болды.
«Олардың төлем карталарына қол жетімділікті пайдалана отырып, ол дүкендердегі сатып алуларды төледі, басқа адамдардың карталарына аударымдар жасады, банкоматтар арқылы қолма-қол ақшаны алды. Сонымен бірге, балалар үйінің басшылығы бұған жол бермеу үшін ештеңе істемеді – тіпті ақша ұрлау фактілері белгілі болғаннан кейін де», – деді Аружан Саин.
Нәтижесінде 32 тәрбиеленушіге 67 млн теңгеден астам материалдық шығын келтірілген. Залалдың бір бөлігі өтелді, сондықтан айыптау қорытындысында 27 жәбірленуші пайда болды, ал шығын сомасы 52 млн теңгеден асты.
Сот Маржан Мұстафинаны 7 жылға бас бостандығынан айырды және он жыл бойы педагогикалық қызмет саласындағы материалдық жауапкершілікке байланысты қызметпен айналысуға тыйым салды. Педагог ҚР ҚК – нің 189-бабы, 4-бөлігі, 2-тармағы — «аса ірі мөлшерде сеніп тапсырылған бөтен мүлікті иемдену немесе талан-таражға салу» бойынша сотталды. Ол орташа қауіпсіздік ҚАЖ мекемесінде жазасын өтейді.
Балалар үйінің директоры Гүлмира Қондыбаева 1000 АЕК (2 778 000 теңге) көлемінде айыппұл төлеуге міндетті. Сонымен қатар, ол мемлекеттік қызметте, жергілікті өзін-өзі басқару органдарында, қаржы ұйымдарында қызмет атқару немесе белгілі бір кәсіби немесе басқа қызметпен айналысу құқығынан айырылды. Директорларды ҚР ҚК 371 – бабы, 2-бөлігі «абайсызда ауыр зардаптарға әкеп соққан немқұрайлылық» бойынша соттады.
Аружан Саин жәбірленушілерге өтемақы қоры балалар үйінің тәрбиеленушілері мен түлектеріне өтемақы төлеу бойынша барлық мәселелерді қысқа мерзімде шешетініне үміт білдірді.
