Бір ай ішінде қарағандылық жастар «Қажет болса — ал, шамаң жетсе — қой» қайырымдылық акциясын өткізді.
Пришахтинскідегі супермаркеттердің бірінде «Қажет болса — ал, шамаң жетсе — қой» деген жарнамамен тегін азық-түлік сөресі пайда болды. Кез-келген мұқтаж адам келіп, өзіне қажетті азық-түлікті ала алады. Игі іске үлес қосқысы келетін жандар бір зат сатып алып, оны сөреге қалдыруға мүмкіндік алды.
«Акция идеясы біздің қордың қызметін ұзақ уақыт бойы қадағалап, көмек көрсетіп жүрген жерлес жандардан бастау алды. Олар ұзақ уақыт дайындалды, қаражат жинады, азық-түлік сатып алды. Тұрғындарға бұл акцияны түсіндіру үшін біз арнайы жадынама жасадық», — дейді «Отзыв» қоғамдық қорының жетекшісі Александр Корогодов.
Тегін сөредегі азық-түлік түрлі-түрлі болды: күріш, қарақұмық, сұлы орамы, макарон, қант, тұз, ұн, су, құрма. Акция туралы әлеуметтік желілерден біліп, көкөністер мен жемістерді бөлшек сатумен айналысатын жас кәсіпкерлер акцияға қосылды. Уақыт өте келе тегін сөреде алма, банан, киви пайда болды.
Александр да акциядан шет қалмады. Ол акцияға қордан қаражат бөлді, осындай қайырымдылық шараларын қалай жақсы өткізу туралы өз тәжірибесімен бөлісті.
«Қарапайым адамдар үшін бұл акция таңқаларлық болды. Көптеген адамдар тегін азық-түлік дегенге сене алмады. Мұқтаж жандардың көпшілігі тегін алуға ұялғаны анық болды. Біз оларды өзіміз шақырып, қажеттісін бердік», — дейді «Отзыв» қорының жетекшісі.
Еріктілер жерлестеріне көмектесуді жалғастыруды жоспарлап отыр. Қайырымдылық адамдарды мейірімді етеді. Көмектесе алатындар осындай шараға бірден ат салысып жатады.
«Біздің қор бұған дейін сегіз қайырымдылық акциясын өткізді. Соңғы акция барысында біз 40 отбасыға көмектестік. Бұл отбасыларға бір айға тамақ сатып алдық. Бұл әлеуметтік осал отбасыларды қолдағысы келетін қарапайым отбасылардың арқасында орын алуда. Мен қарағандылықтарға үндеу жолдағым келеді. Қалыс қалмаңыздар, әр тиын мұқтаж балаларға, жалғызбасты аналарға, мүгедектерге күлкі мен қуаныш сыйлай алады», — деді Александр Корогодов.
