Пригородный тұрғын алабында 100 пәтер бөлінеді.
«Нұр-Сұлтан» тұрғын үй орталығы тұрғындардың әлеуметтік осал топтары үшін сатып алу құқығынсыз жалға берілетін тұрғын үйге құжаттар қабылдау туралы жариялады. Өтініш беру үшін «халықтың әлеуметтік осал топтары» санатында Нұр-Сұлтанда тұрғын үй кезегінде тұру керек.
Халықтың әлеуметтік осал топтарына:
• Ұлы Отан соғысының ардагерлеріне теңестірілген жеңілдіктері бар ардагерлер;
• басқа мемлекеттердің аумағындағы әскери операциялардың ардагерлері;
• бірінші және екінші топтағы мүгедектігі бар жандар;
• мүгедектігі бар балалар немесе оларды тәрбиелеп отырған отбасылар;
• кейбір созылмалы аурулардың ауыр түрлерімен ауыратын адамдар;
• қарт азаматтар;
• жетім балалар;
• қандастар;
• экологиялық апат салдарынан үйінен айырылған адамдар;
• қызметтік міндеттерін орындау кезінде қаза тапқан адамдардың отбасылары;
• толық емес отбасылар.
Барлығы «Пригородный» тұрғын алабында (Сарытоғай көшесі) 100 пәтер беріледі: 12 бір бөлмелі пәтер (37,8-38,2 м2) және 18 екі бөлмелі пәтер (44,7-50 м2). Оның ішінде 30 пәтер тек жетім балаларға арналған, қалған 70 пәтер басқа санаттарға бөлінеді.
Ай сайынғы жалдау ақысы 5000 мен 15000 теңге аралығында болады. Келісімшарт ұзарту құқығымен бес жылға жасалады. Бұл пәтерде бес жыл сайын келісімшартты жаңарта отырып, шексіз уақыт тұруға болады.
Құжаттар 2021 жылдың 1-8 маусымы аралығында тек katysu.zhilfond.kz порталы арқылы электронды түрде қабылданады.
Іріктеу кезектің күні мен отбасы құрамына байланысты жүзеге асырылады. Өтініштерді қарау нәтижелері туралы кейінірек zhilfond.kz, zhil-astana.kz сайттарында және Тұрғын үй орталығының әлеуметтік желілерінде хабарланады.
Бөлмені, қабатты таңдау мүмкін емес, ал тірек-қимыл аппараты бұзылған мүгедектігі бар жандарға екінші қабаттан жоғары емес пәтер беріледі. Сатып алу құқығынсыз жалдамалы тұрғын үй алғаннан кейін адам кезектен шығарылады.
