Кітап пен поэзияны сүйетіндер үшін Нұр-Сұлтан қаласында «ашық аспан астындағы кітапхана» ашылады. Бұл туралы қала әкімдігінің ресми сайты хабарлайды.
Бұл елордадағы мұндай алғашқы акция. «Байқоңыр» ауданы әкімінің аппараты ұйымдастырған іс-шара жазғы маусым бойы әр сенбі сайын өткізілетін болады. Ашылу салтанатына ақын, әдебиет сыншысы, Қазақстан Республикасының Еңбек сіңірген қайраткері, Халықаралық «Алаш» әдеби сыйлығының лауреаты, Қазақстан Жазушылар Одағы қалалық филиалының директоры Дәулеткерей Қапұлы қатысады. Ол өлеңдерін оқып, репертуарындағы бірнеше әндерді орындайды.
Іс-шара 12 маусымда сағат 11-де өтеді. Өтетін орны: Жазушылар аллеясы (Абай даңғылы мен А. Сенбинов көшесінің қиылысы). Кітапқұмарлардың кездесулері қатаң санитарлық талаптарды сақтай отырып өткізілетінін атап өткен жөн.
