Қазақстан Ұлттық Банкінің (ҚҰБ) қолма-қол ақша айналысы департаменті басқармасының бастығы Динара Даутова мәлімдегендей, әдетте дүкендерде номиналы 1000 теңгелік «Күлтегін» естелік банкноттарын қабылдаудан бас тартатын азаматтар ҚҰБ-ға өтініш білдіреді.
Естеріңізге сала кетейік, бұл купюра заңды төлем құралы болып табылады. Оларды барлық басқа естелік банкноттар сияқты төлемдердің, банк операцияларының және аударымдардың барлық түрлері бойынша қабылдауға міндетті. Мұндай банкноттарды қабылдаудан бас тартқаны үшін ҚР ӘҚБтК-нің 206-бабына сәйкес әкімшілік жауапкершілік көзделген. Егер сізде естелік банкноттар қабылданбаса, Ұлттық Банктің аумақтық филиалына жүгіну қажет. Бейнеге түсіруді немесе банкнотты қабылдаудан бас тартудың жазбаша негіздемесін талап етуді ұсынамыз.
Ол «Күлтегін» банкнотымен қатар айналыста атаулы күндер мен оқиғаларға арналған естелік банкноттардың басқа да түрлері бар екенін атап өтті.
Олардың барлығы да заңды төлем құралы. Оларды ЕДБ мен «Қазпошта» АҚ барлық бөлімшелерінде, сондай-ақ ҚР ҰБ филиалдарында айырбастауға болады. Олар табиғи тозуына қарай айналымнан алынады.
Естелік банкноттардың толық тізімі, сондай-ақ Ұлттық банк филиалдарының мекенжайлары мен байланыстары туралы ақпарат ҚҰБ сайтында қолжетімді .
Анықтамалық:
Түркі жазуының «Күлтегін» ескерткішіне арналған номиналы 1000 теңгелік банкнот (айналымға енгізілген күні: 12.12.2013)
Ұлттық валюта теңгенің енгізілуінің 20 жылдығына арналған номиналы 20 000 теңгелік банкнот (айналымға енгізілген күні: 01.12.2015)
Қазақстан Республикасы Тәуелсіздігінің 25 жылдығына арналған номиналы 10 000 теңгелік банкнот (айналымға енгізілген күні: 01.12.2016)
Қазақстан Республикасы Тәуелсіздігінің 20 жылдығына арналған номиналы 10 000 теңгелік банкнот (айналымға енгізілген күні: 04.07.2011)
Теңгенің ұлттық валютасы енгізілуінің 15 жылдығына арналған номиналы 5000 теңгелік банкнот (айналымға енгізілген күні: 08.07.2008)
2011 жылғы VII Қысқы Азия ойындарына арналған номиналы 2000 теңгелік банкнот (айналымға енгізілген күні: 17.01.2011)
Қазақстан Республикасының Ислам Конференциясы Ұйымына төрағалық етуіне арналған номиналы 1000 теңгелік банкнот (айналымға енгізілген күні: 25.05.2011)
2010 жылы Еуропадағы қауіпсіздік және Ынтымақтастық Ұйымына (ЕҚЫҰ) Қазақстан Республикасының төрағалық етуіне арналған номиналы 1000 теңгелік банкнот (айналымға енгізілген күні: 05.01.2010)
