Карантиндік шараларды күшейту туралы елордалық санитарлық дәрігердің қаулысына сәйкес қаланың тамақтану орындары қысқартылған жұмыс тәртібіне көшті, деп хабарлайды қала әкімдігінің ресми сайты.
Сенбі мен жексенбі күндері астананың тамақтану орындары — кафелер, мейрамханалар, кофеханалар келушілерді қабылдамайды. Сонымен бірге тамақ жеткізу қызметі жүзеге асырылады.
Жұмыс күндері жоғарыда аталған тамақтандыру объектілеріне таңғы 7-ден 17-ге дейін жұмыс істеуге рұқсат етіледі, Ashyq жобасына қатысатын мекемелер кешкі 8-ге дейін жұмыс істей алады.
Асханалар үшін жұмыс кестесі жұмыс күндері және демалыс күндері сағат 07: 00-ден 21: 00-ге дейін белгіленеді.
Сенбі мен жексенбі күндері елордалық сауда-ойын-сауық орталықтары мен сауда үйлерінің жұмысына да тыйым салынады.
Нұр-Сұлтан қаласында шектеу және карантиндік шараларды күшейту туралы қаулы Қазақстан Республикасында коронавирустық инфекцияның пайда болуы мен таралуын болдырмау жөніндегі ведомствоаралық комиссия отырысының 2021 жылғы 14 шілдедегі хаттамасына сәйкес қабылданды.
