Ұстаздар күні қарсаңында Нұр-Сұлтан тұрғындары қоныс тойын тойлауда. Пәтер кілттерін кезекте тұрған қала тұрғындарының бір бөлігі, сондай-ақ халықтың әлеуметтік осал топтары санатындағы азаматтардың тағы бір бөлігі алды. «Нұрлы жер» мемлекеттік бағдарламасы аясында «Отау» көп пәтерлі тұрғын үй кешені пайдалануға берілді, деп хабарлайды елорда әкімдігінің сайты.
«Бұл тұрғын үй кешенінен гөрі шағын аудан деуге келеді. Бұл аумақта келесі жылы жаңа мектеп салынады. Қазірдің өзінде жаңа автобус бағыты іске қосылады. Балабақша мен медпункт сияқты басқа да әлеуметтік маңызы бар ұйымдар салынады. Абаттандыру жұмыстары жүргізілуде. Халықтың жайлы өмір сүруі үшін барлық жағдай жасалады», — деді елорда әкімінің орынбасары Нұрлан Нұркенов «Отау» тұрғын үй кешеніндегі пәтерлердің кілтін табыстау рәсімінде.
Алматы облысында орналасқан «Отау» тұрғын үй кешенінің пәтерлері «Нұрлы жер» мемлекеттік бағдарламасы аясында «Отбасы банк» жүйесі арқылы пайдалануға берілді. Жаңа кешенде 1884 пәтер бар.
Бүгін қоныс тойын елордалық №65 мектептің мұғалімі Ағила Ғаниқызы да тойлайды.
«Мен өз үйім болғанын қатты армандадым. Егер сіз бір нәрсені шынымен қаласаңыз, бәріне қол жеткізе аласыз. Ал бүгін мен пәтерімнің кілтін аламын», — деп жас мұғалім қуанышымен бөлісті.
Мемлекет басшысының тапсырмасы бойынша елордада қолжетімді тұрғын үй көлемін ұлғайту бойынша жүйелі жұмыстар жүргізілуде. Биыл Нұр-Сұлтанда 10 000 жеңілдетілген әлеуметтік пәтер салынады. Тек соңғы үш жылдың ішінде қолжетімді баспана саны 5,5 еседен астам өсті.
Мысалы 2018 жылы 1800 әлеуметтік пәтер, 2019 жылы — 2900 әлеуметтік пәтер, 2020 жылы — 7000-нан астам пәтер салынып, пайдалануға берілді.
Сонымен қатар Мемлекет басшысының бастамасымен қолға алынған «Жұмыс істейтін жастарға жалға берілетін тұрғын үй» бағдарламасы биыл да жалғасын табады.
