Несие белсенді емес карта арқылы алынған, дейді әйел.
Жалғызбасты ана Айжан Қуатова үйде болмаған кезде, алаяқтар оның мүгедектігі бар қызына хабарласып, әйелдің атына 500 мың теңге көлемінде несие алған.
«Олар маған 500 мың теңгеге несие алдым деген құжат жіберді. Дәлірек айтсам, 477 мың теңге алыппын, 20 мың теңге сақтандыруға қалдырыппын. Бұл несие үш жыл бойы жұмыс істемеген карта арқылы онлайн режимде алынған», — деді Айжан Қуатова.
Әйел сегіз жылдан бері жұмыс істемеген. Мүгедектігі бар қызына қарап отыр.
Мамандар алаяқтар алдаудың түрлі жолдарын табатынын атап өтті. Өзін банк қызметкерімін деп таныстырған адам қосымшаны смартфонына жүктеп алуды қөтінуі мүмкін. Көптеген азаматтардың өзі жеке мәліметтерін алаяқтарға береді. Алаяқ жеке кабинетке кіріп, несие рәсімдейді немесе басқа картаға ақша аударады.
«Өзіңіз туралы жеке ақпаратты ешкімге бермеңіз. Есептік жазбаңыз бен карта нөміріңізді айтпаңыз. Картаңызды жоғалтып алсаңыз, дереу полицияға хабарласыңыз», — деп қосты адвокат Ғабит Өмірбеков.
Файлдарды жүктеп алуға шақыратын хабарламалар, вирустық сілтемелері бар спам, қысқартылған сілтемелер, белгісіз нөмірге қоңырау шалуға шақыратын ойындар мен қосымшалар — бұл алаяқтардың айласы. Егер қоңырау шалушы SMS кодын сұраса, сөйлесуді тоқтатып, банктің байланыс орталығына хабарласқан жөн.
