ҚР Премьер-Министрінің орынбасары Ералы Тоғжанов қазақстандық жастарды баспанамен қалай қамтамасыз ету жоспарланып отырғанын айтты.
Ералы Тоғжановтың айтуынша, «Ұлттық рухани жаңғыру» ұлттық жобасында 2025 жылға қарай тұрғын үй құрылысының барлық бағдарламалары аясында жас отбасылар үшін 25 пайыздық квота енгізу көзделген.
Сондай-ақ, 2025 жылға дейін барлық өңірлерде әкімдіктермен бірлесіп «Отбасы банк» жеңілдетілген ипотека бағдарламасын іске қосу жоспарлануда.
Бүгінгі таңда жастарға арналған өңірлік тұрғын үй бағдарламалары үш өңірде – Нұр-Сұлтан, Алматы, Шымкент қалаларында іске асырылуда. Жыл соңына дейін осындай бағдарламаларды іске қосу тағы алты өңірде – Алматы, Жамбыл, Қызылорда, Маңғыстау, Қарағанды, Батыс Қазақстан облыстарында қарастырылуда.
ҚР премьер-Министрінің орынбасары Ералы Тоғжанов.
Ералы Тоғжанов 2019 жылдан бастап Қазақстанда жұмыс істейтін жастарға жалдамалы тұрғын үй берілетінін еске салды-барлығы осындай 7 мыңға жуық пәтер берілді.
Бұл бағдарлама жалғасатын болады. 2025 жылға дейін жұмыс істейтін жастарға 12 мың пәтер беру жоспарланған. Ал жыл соңына дейін жалға берілетін тұрғын үй беру қағидаларына жастар үшін ай сайынғы табысты растауға қойылатын талаптарды 40-тан 25 АЕК-ке дейін төмендету бөлігінде өзгерістер енгізілетін болады. Бұл жастардың жалға берілетін тұрғын үй алу мүмкіндіктерін айтарлықтай кеңейтеді.
