Әр айдың соңғы аптасында өткізу жоспарлануда.
Ай сайын 24-30 аралығында электронды еңбек биржасы негізінде бос жұмыс орындарының онлайн жәрмеңкесі өтеді, деп хабарлайды Еңбек және халықты әлеуметтік қорғау министрлігінің сайты.
Мұндай жәрмеңкелердің тұрақты түрде өткізіліп тұратынын министр Тамара Дүйсенова ірі компаниялардың басшыларымен кездесуінде мәлімдеді. Министрдің айтуынша, ERG компаниялар тобымен бірлескен жастарды жұмысқа орналастыру жобасы басталған мамыр айынан бері 159 адам жұмысқа орналасты.
«Электрондық еңбек биржасы және оның негізінде тұрақты негізде өткізілетін онлайн бос жұмыс орындары жәрмеңкелері жұмыс іздеушілер мен жұмыс берушілер үшін еңбек нарығының ашықтығы мен қолжетімділігін қамтамасыз етудің маңызды және тиімді құралы болады», — деп үміттенеді министрлік.
