Бұл ретте министрлік зейнеткерлікке ерте шығу Қазақстандықтардың көпшілігіне лайықты төлемдерді қамтамасыз етпейтініне сенеді.
ҚР Еңбек және халықты әлеуметтік қорғау министрі Тамара Дүйсенова зейнет жасын 58 жасқа дейін қысқарту жөніндегі Қазақстан әйелдер қозғалысының өкілдерімен бесінші кездесуін өткізді.
Дүйсенова зейнетақы жүйесін жетілдіру бойынша ұсынылған тәсілдер туралы айтты. Министр еңбек өтілі жоқ және бүгінде жинақтаушы зейнетақы жүйесіне қатыспаған қазақстандықтар үшін 50 жастан асқанда ерте зейнеткерлікке шығу лайықты төлемдерді қамтамасыз етпейтінін атап өтті.
Сонымен қатар, қолданыстағы заңнама азаматтардың зейнетке ерте шығу құқығын береді. БЖЗҚ-да жинақталған зейнетақы қаражаты жеткілікті болған жағдайда, 55 (ерлер) және 52,5 жасқа (әйелдер) жеткенде қазақстандықтар зейнетақы аннуитетіне (зейнеткерлік жасқа жеткенге дейін жинақталған зейнетақы қаражатынан төлем алу құқығы) өтініш бере алады. Зиянды еңбек жағдайында жұмыс істейтін азаматтар 40 жастан бастап зейнетақы аннуитеті пайдалана алады, ал мұндай шарттар бойынша төлемдер 50 жастан басталады.
Тамара Дүйсенова қозғалыс белсенділерін Еңбек министрлігі азаматтарды зейнетақымен қамтамасыз етуді жақсартуға ұсынып отырған жаңа тәсілдер туралы да хабардар етті.
«Біз базалық және ынтымақты зейнетақыларды тағайындау кезінде параметрлерді өзгерту туралы бастама көтердік. Қазір біздің ұсыныстарымызды басқа да мүдделі мемлекеттік органдар қарастыруда. Оларға қолдау көрсетілсе, бұл келесі жылдан бастап бюджеттен төленетін зейнетақы төлемдерінің көлемін арттырады. Оң нәтижені қазіргі зейнеткерлер де, болашақта зейнетке шығатындар да сезеді», — деді Еңбек және халықты әлеуметтік қорғау министрі.
Сондай-ақ Еңбек министрлігі зейнеткерлік жастағы әйелдерді барынша көп жұмыспен қамту мақсатында «Күміс ғасыр» жобасының тетіктерін қарастыруда.
«Біз жобаға қатысу мерзімін үш жылға дейін ұлғайтуды жоспарлап отырмыз және бюджет қаражатынан жалақысын ішінара субсидиялау арқылы әйелдерді жұмысқа орналастырудың арнайы бағыттарын қарастырамыз. Бұл олардың зейнеткерлікке шыққанға дейін жинақтаушы зейнетақы жүйесіне барынша белсенді қатысуына мүмкіндік береді. Бұл әсіресе еңбек өтілі аз, тиісінше, БЖЗҚ-да елеусіз жинақтары бар әйелдер үшін маңызды», — деді министр.
Тамара Дүйсенова азаматтарды зейнетақымен қамсыздандыру жүйесін жетілдіру жұмыстары жалғасатынын айтты.
