Балалар діни рәсімдер мен ұжымдық дұғаларға тартылды. Кәмелетке толмағандарды ұстаған ғимараттардан тыйым салынған әдебиеттер табылды.
Алматы полициясы балалар интернат үйінің атын жамылған қайырымдылық мекемелерінің кәмелетке толмағанды өз-өзіне қол жұмсауына және басқа да қылмыстарға итермеледі деген күдікпен қылмыстық істі тергеп жатыр.
«Осы пансионаттарда тұратын кәмелетке толмағандар діни рәсімдер мен ұжымдық дұғаларға жүйелі түрде тартылды. Қарсы шыққан балаларды тамақ пен судан айыру арқылы жазалады, кей жағдайда физикалық зорлық қолданылды», — деді полиция.
Пансионаттарда тінту кезінде шетелдік діни әдебиеттер мен оқу құралдары, соның ішінде Қазақстанда экстремистік деп танылған және таратуға тыйым салынған материалдар табылды.
Полиция тергеу жүріп жатқанын айтты. Тергеу мүддесіне қатысты басқа мәліметтер жарияланбайды.
Әлеуметтік желіде алматылықтар бұл Наурызбай ауданында жұмыс істеген пансионат деп жазып жатыр. Таңертең полиция үш қабатты ғимаратта болды.
2022 жылдың желтоқсанында Астанада да аз қамтылған отбасы балаларына арналған интернат үйі атын жамылып әрекет еткен қайырымдылық қорларына қатысты қылмыстық іс қозғалды.
