Мәжілісте Қаржы нарығын дамыту және реттеу агенттігінің төрағасы Мәдина Әбілқасымова несиелік алаяқтықпен күресу шаралары туралы айтты.
Әбілқасымованың айтуынша, агенттік екінші деңгейлі банктермен меморандум дайындап, қазір қол қойып жатыр, оған сәйкес банктік операция алаяқтық деп танылса, мұндай несиелер бойынша сыйақыны есептеу тоқтатылады.
«Ал бұл алаяқтық несие екені және пайдаланушының өзі бұл қаражатты алмағаны сотта дәлелденсе, банк бұл соманы қайтарады. Несие толығымен есептен шығарылады немесе пайдаланушының жеке қаражаты болса, оған өтеледі», — деді Әбілқасымова.
Бұл ретте қаржы реттеушісінің төрағасы бұл үшін заңнамалық деңгейде белгілі бір өзгерістер қажет болатынын және олар депутаттардың қолдауына сенетінін атап өтті.
«Жол картасы аясында біз түзетулер де дайындадық. Ақпараттық қауіпсіздік процедураларын сақтамау салдарынан алаяқтық орын алса, қаржылық ұйымның залал үшін жауапкершілігін заңнамалық деңгейде белгілеуді ұсынамыз. Осы мәселелерді Парламентке шығару кезінде қолдау көрсетулеріңізді сұраймыз», — деп толықтырды ведомство басшысы.
Мәдина Әбілқасымованың айтуынша, тиісті заң жобасын маусым айының соңына дейін Мәжіліске енгізу жоспарлануда.
