Парламент Мәжілісінің депутаты Ирина Смирнова жетім және ата-анасының қамқорлығынсыз қалған балаларды тұрғын үймен қамтамасыз етудің ыңғайлы және жеңілдетілген бағдарламаларының нұсқаларын қарастыруды ұсынды.
Шешім ретінде – тұрғын үй ваучерлері, кейіннен жекешелендірумен жалға алу және тікелей қамтамасыз ету. Бүгінде баспана кезегінде 60 мыңнан астам жетім бала бар. Тәуелсіздік жылдарында небәрі 8500 адам пәтер кілтін алған.
Смирнованың есептеулері бойынша барлығын қамтамасыз ету үшін 120 жыл қажет. Бұл кезекте тұрғандардың тізімін толықтыруды есепке алмағанда.
Сондықтан қолдау шарттарын өзгерту уақыты келді.
Ирина Смирнова, ҚР Парламенті Мәжілісінің депутаты:
– Шағын Петропавлда 1500 пәтердің табылғаны туралы мәліметтер, Қарағандыда мемлекеттік қызметшілерге азаматтардың әлеуметтік осал санаттарына арналған тұрғын үйді заңсыз бөлу фактілері және басқа да мәліметтер жетім жандарға арналған баспана бар екенін көрсетеді, бірақ оны мемлекеттік қызметшілер қолынан шығарғысы келмейді деген ойға итермелейді
Халықтық партия еліміздің осы санаттағы азаматтарын баспанамен қамтамасыз ету мүмкіндігін жедел қарастыруды ұсынып отыр.
