Ғылым және жоғары білім министрлігі Жоғары және жоғары оқу орнынан кейінгі білім комитеті төрағасының орынбасары Нұрбек Сапарқожаев мемлекеттік грантты тағайындау конкурсына қатысу үшін қандай құжаттар қажет екенін түсіндірді.
«Негізі өтініш беруші туралы ақпарат сұралады. Атап айтқанда түлектің аты-жөні, туған жылы, аттестат және басқа да қосымша жеке мәліметтері жүктеледі. Барлық қажетті жолдар толтырылған болса және құжаттар жеткілікті болса, «жіберу» түймесін басу керек. Кейін өтініш беруші құжаты қабылданғаны туралы анықтама алады», – дейді Нұрбек Сапарходжаев.
Ертеңнен бастап Egov.kz порталы арқылы грантқа құжаттарды қабылдау басталады. Нұрбек Сапарқожаевтың айтуынша, грантқа өтініштер 13-20 шілде аралығында қабылданады.
Қазақстанда барлық гранттардың 60 пайызы инженерлік-техникалық мамандықтарға бөлінген.
Жоғары және жоғары оқу орнынан кейінгі білім берудің барлық деңгейлері бойынша кадрлар даярлауға бөлінген білім гранттарының жалпы саны 88 мыңды құрайды. Сонымен қатар педагогикалық квота бойынша гранттар саны артты, 2023 жылы бұл салаға 6280 грант бөлінеді. «Серпін» бағдарламасы бойынша 3653 грант бөлінді.
