Әйел жеке сабақтар кезінде ерекше балаларды үнемі ұрып-соғатын.
Атырау қалалық соты кәмелетке толмаған үш баланы азаптағаны үшін түзеу орталығының маманын төрт жылға бас бостандығынан айырды.
Сот мамандардың міндетіне балаларға ерекше дағдыларды үйрету, мінез-құлықты түзету кіреді деп хабарлады. Ол балалармен балалар орталығының арнайы бөлмесінде жеке жұмыс жасады.
«Кәмелетке толмағандармен жеке сабақтар өткізген кезде кәмелетке толмаған үш бала жүйелі түрде ұрып-соғу немесе өзге де зорлық-зомбылық әрекеттері арқылы физикалық және психикалық зардап шеккен», — деді сот.
Сотталушы өз кінәсін ішінара мойындады, ол және оның қорғаушысы әрекеттерді «Кәмелетке толмаған баланы тәрбиелеу жөніндегі міндеттерді орындамау» бабына қайта саралауды сұрады.
Алайда сот әйелді «Азаптау» бабы бойынша кінәлі тауып, төрт жылға бас бостандығынан айырды.
Сондай-ақ, сотталушыдан жәбірленушілердің пайдасына 6 миллион теңге моральдық залал өтелді.
Соттың үкімі заңды күшіне енген жоқ.
