Лагерьлерде тұру, тамақтану, санитарлық және басқа да қауіпсіздік талаптарының сақталуы тексеріледі.
Алматыда мектеп оқушылары сауна ғимаратына орналастырылған оқиғадан кейін Қазақстанның түкпір-түкпіріндегі балалар лагерлері тексерілетін болады, деп хабарлайды Бас прокуратураның баспасөз қызметі.
«Жазғы кезеңді және балалардың құқықтарының ықтимал бұзылуын ескере отырып, Бас Прокурордың тапсырмасы бойынша аумақтық прокурорлар уәкілетті органдармен бірлесіп мемлекеттік, жеке және шатырлы лагерьлердің қызметін тексеруге кірісті. Тексерулермен балалардың тұру жағдайларын, санитарлық-эпидемиологиялық нормалардың сақталуын, өрт қауіпсіздігін, тамақпен және медициналық көмекпен қамтамасыз етуді қамту жоспарлануда», — делінген хабарламада.
Прокурорлар 2023 жылға арналған балалардың жазғы демалысын ұйымдастыру бойынша қызметтерді сатып алудың заңдылығын да тексеретін болады.
Қазір елімізде 848 лагерь бар, оның 118-і мемлекеттік, 100-і жекеменшік, 630-ы шатырлы.
Бұған дейін Алматыда балалар лагерлерінің бірінің төңірегінде жанжал шыққан болатын. Жетісу өңірінің балалары сауна ғимаратына орналастырылып, ата-аналардың наразылығын тудырды. Жеткізушімен келісім-шарт бұзылды, білім бөлімінің жауапты қызметкеріне қатаң сөгіс берілді. Алматы прокуратурасы Қылмыстық кодекстің 361 және 140-баптары – «Лауазымдық өкiлеттiктерді теріс пайдалану» және «Кәмелетке толмаған баланы тәрбиелеу жөніндегі міндеттерді орындамау» бойынша сотқа дейінгі тергеуді бастады.
