Әлеуметтік желіде Қызылорда облысында балабақша тәрбиеленушілері орын тапшылығынан еденде жатып ұйықтауда екендігі туралы ақпарат тарауда. Осыған байланысты облыстық білім басқармасы тексеру жұмыстарын бастады.
Әлеуметтік желіде Қазалы ауданындағы балабақшада бүлдіршіндерді еденге жатқызуға мәжбүр болғаны туралы ақпарат таралып, фотосуреттер желіде жарияланды. Сондай-ақ фотосуреттерден балалардың бір жерде екі-үшеуінің жатқанын көруге болады.
Облыстық білім басқармасы бұл жағдай бойынша түсініктеме берді.
«Осы мәселе бойынша Қызылорда облысының білім басқармасы келесіні хабарлайды. Облыстық білім басқармасы арнайы жұмыс тобын құрды, аудандағы балабақшалардағы жағдайды тексеру жұмыстары жүргізілуде. Осы жұмыстардың қорытындысы бойынша кемшіліктер анықталған жағдайда, тиісті уәкілетті органдарға ұсыныстар енгізіліп, заң аясында шешімдер қабылданады», — дейді білім басқармасы хабарламасында.
