Астанада жолаушылар мен жүк тасымалының жаңа ережелерін енгізгісі келеді. Бұл туралы қоғамдық кеңес отырысы барысында қалалық Көлік және жол-көлік инфрақұрылымын дамыту басқармасы басшысының орынбасары Ержан Диханбаев мәлім етті.
«Бұған дейін бұл ережелерді Қазақстан Республикасының Үкіметі бекіткен болатын, бірақ 2023 жылдың 1 шілдесінен бастап бұл функция елорданың жергілікті атқарушы органына берілді. Осыған байланысты Көлік және жол-көлік инфрақұрылымын дамыту басқармасы елордада автомобиль көлігімен жолаушылар мен багажды тасымалдаудың жаңа ережелерін әзірлеуді жоспарлап отыр», — деді Ержан Диханбаев.
Сондай-ақ басқарма басшысының орынбасары қоғамдық кеңес мүшелерінен НҚА нормаларына сәйкес жаңа редакцияда бекітуді сұрады.
«Айта кету керек, ережені бекіту функциясын беру қалаға жолаушылар көлігі және көлік инфрақұрылымы саласында тиімді шешімдер қабылдауға мүмкіндік береді. Атап айтқанда, жаңа өзгерістер енгізу кезінде үйлестіру қадамдарын қысқарту, жаңа элементтерді енгізу, қалаға қазіргі уақытта қажет жолаушылар көлігі саласында жедел шаралар қабылдау», — деп қосты спикер.
Бұған дейін Ержан Диханбаев МЖӘ келісімі бойынша елордада 10 мың ақылы автотұрақ іске қосу жоспарланып отырғанын айтқан болатын.
Сондай-ақ ол бүгінде елорданың қоғамдық көліктерінде жылжымалы құрам тапшылығы өткір сезіліп жатқанын атап өтті. Бұл мәселені шешу үшін 2023 жылы 400 автобус сатып алынса, оның 125-і қалаға келді.
