Рудный соты Рудный тау-кен технологиялық колледжінің асханасында студенттердің жаппай улану дерегі бойынша үкім шығарды, — деп хабарлайды «Қостанай жаңалықтары» басылымы.
Студенттердің улану дерегі бойынша прокуратураның қадағалауымен тексеру жүргізілді. Тергеу барысында анықталғандай, колледжде асхананы жалға алған «S-Salta» ЖШС басшысы өз міндеттемелерін елемей, санитарлық талаптарды бұзған, салдары жаппай улануға алып келген. Сондай-ақ полицейлер әйелдің медициналық тексеруден өту туралы жалған құжаттарды, яғни медициналық кітапшаларды пайдаланғанын анықтады. Рудный прокуратурасы қылмыстық істі сотқа жіберіп, мемлекеттік айыптауды қолдады.
7 тамызда сот үкімімен әйел жалған құжат пайдаланғаны және санитарлық ережелерді бұзғаны үшін кінәлі деп танылды. Ол үш жыл мерзімге белгілі бір қызметпен айналысуға тыйым салу екі жылға бас бостандығынан айыру жазасына кесілді. Үкім әлі заңды күшіне енген жоқ.
