Қазақстанда халықтың әлеуметтік осал санаттарының құқықтары жөніндегі уәкіл мәртебесін заңнамалық тұрғыдан бекіту керек. Бұл туралы Мемлекет басшысы құқық қорғау жүйесінің өкілдерімен кездесуінде айтты.
«Халықтың әлеуметтік осал санаттарының құқықтарын қорғау жөніндегі уәкіл институты құрылды. Ерекше қажеттіліктері бар азаматтар жеңілдіктерді пайдаланып қана қоймай, қоғам өміріне белсенді араласа алуы керек. Мәселен, Астанада мүмкіндігі шектеулі жандарға жағдай жасалмаған жерасты жаяу жүргіншілер жолы салынды. Бұған мүлдем жол беруге болмайды»,- деді Қасым-Жомарт Тоқаев.
Мемлекет басшысы үкіметке оларды әлеуметтік бейімдеу үшін уәкілетті тұлға әзірлеген инфрақұрылымды дамыту жобаларын қолдау және жақын арада жүзеге асыру мүмкіндігін зерделеуді тапсырды.
«Өкілдіктердің әкімдерге функционалдық тәуелділігін төмендету және Бала құқықтары жөніндегі өңірлік уәкілдерді тағайындау кезінде балалар омбудсменінің рөлін күшейту маңызды. Кәсіпкерлердің құқықтарын қорғау жөніндегі уәкілге еліміздегі бизнес-ахуалды жақсартуда маңызды рөл беріледі»,-деді Мемлекет басшысы.
Еске салайық, Мемлекет басшысы Қасым-Жомарт Тоқаев адам құқықтарын қорғау жүйесінің өкілдерімен кездесу өткізіп, оның барысында адам құқықтарын қорғау жүйесінің басым міндеттерін атаған болатын.
Мемлекет басшысы Конституцияға тоқталды, сондай-ақ өтініштер мен шағымдардың өсуіне тоқталды.
