Қазан айында зейнетақы алатын мүгедектігі бар жандарға арнайы жәрдемақы тағайындау толығымен автоматтандырылды. Сондай-ақ, тағы жеті төлемді ресімдеу мерзімі қысқартылды.
Қазақстанда көптеген жәрдемақылар мен әлеуметтік төлемдер проактивті түрде, яғни алушының тікелей өтінішінсіз тағайындалады. Бұл азаматтар туралы ақпаратты автоматты түрде бақылайтын және мемлекет тарапынан қолдау шараларына құқығы бар адамдарды анықтайтын цифрлық отбасы картасын іске қосудың арқасында мүмкін болды.
ҚР Еңбек және халықты әлеуметтік қорғау министрлігі атап өткендей, бүгінде әлеуметтік-еңбек саласындағы мемлекеттік қызметтердің 50 түрінің 48-і электронды форматта, ал 29-ы проактивті түрде берілуі мүмкін. Оның ішінде Мемлекеттік әлеуметтік сақтандыру қорынан көптеген жәрдемақылар мен әлеуметтік төлемдерді автоматты түрде тағайындау.
Жалпы, жыл басынан бері бір миллионнан астам қызмет автоматты түрде көрсетілді.
Бұл ретте қазан айында жасына байланысты зейнетақы төлемдері немесе еңбек сіңірген жылдары үшін зейнетақы төлемдері тағайындалған бірінші, екінші және үшінші топтағы мүгедектігі бар жандарға арнаулы мемлекеттік жәрдемақы тағайындау қызметі толығымен автоматтандырылды. Енді бұл жеңілдіктерді тағайындағанда адам факторы алынып тасталды.
Сондай-ақ, «Азаматтарға арналған үкімет» мемлекеттік мекемесінің бірнеше қызметкерінің өтініштерді қараудан шеттетілуінің арқасында Мемлекеттік әлеуметтік сақтандыру қорынан үш жәрдемақы мен төрт әлеуметтік төлемді тағайындау да жеделдетілді.
Жәрдемақылар:
1. баланың дүниеге келуіне байланысты;
2. бір жарым жасқа дейінгі бала күтімі;
3. көп балалы отбасы.
Әлеуметтік төлемдер:
1. жүктілік және босану;
2. бір жарым жасқа толғанға дейін бала күтімі бойынша;
3. еңбекке қабілеттілігін жоғалтқан жағдайда;
4. жұмысынан айырылған жағдайда.
Бұрын оларды тағайындау туралы шешім қабылдауға жеті адам тартылған, ал процестің өзі сегіз жұмыс күніне дейін созылатын. Қазір төрт адам осымен айналысып жатыр, мерзімі төрт күнге дейін қысқартылды.
Айтпақшы, жәрдемақылар мен әлеуметтік төлемдерді тағайындауды автоматтандыру қазақстандықтардың әлеуметтік саласына ғана емес, мемлекеттік бюджетке де тиімді әсер етті. 2023 жылы осылайша 360 миллион теңгеден астам қаржыны үнемдеуге мүмкіндік туды.
