Қазақстандық «KazAID» халықаралық даму агенттігі мен ЮНИСЕФ-тің Еуропа және Орталық Азиядағы аймақтық кеңсесі балалар құқықтарын қорғау саласындағы әріптестікті одан әрі кеңейту мақсатында өзара түсіністік туралы меморандумға қол қойды.
Меморандум тұрақты даму мақсаттарына қол жеткізуге ықпал ететін бастамаларды қолдауды растайды. Қол қою рәсіміне «KazAID» Қазақстан халықаралық даму агенттігінің басқарма төрағасы Әркен Арыстанов пен ЮНИСЕФ-тің Еуропа және Орталық Азия бойынша аймақтық кеңсесі директорының орынбасары Октавиан Бивол қатысты.
Келісімге сәйкес ЮНИСЕФ пен KazAID сапалы инклюзивті білім беру мен цифрлық оқытуға, балалар кедейлігін азайтуға, климаттың өзгеруіне бейімделуге, балалар құқықтарын ілгерілетуге көмектесуге, Орталық Азия елдерін дамудың ресми көмегіне қосуға және тұрақты мақсаттарға қатысты міндеттемелерді орындауға қолдау көрсетеді.
Ынтымақтастық балалар мен жастардың мүдделері үшін маңызды прогреске қол жеткізу үшін күштерді біріктіру арқылы серіктестік үшін мүмкіндіктер жасайды.
«KazAID балалар мен жастардың дамуына жағдай жасау, олардың білімін арттыру және денсаулығын нығайту саласындағы бағдарламалар мен жобаларды жүзеге асыруға мүдделі» — деді Аркен Арыстанов.
«Балалардың құқықтарын қорғау және балалар мен олардың отбасылары үшін тұрақты нәтижелерге қол жеткізу үшін ынтымақтастық пен сенімді серіктестік қажет. Біз Орталық Азиядағы және одан тысқары аймақтардағы балалардың өмірін жақсарту үшін KazAID-пен жұмысымызды жалғастыруға қуаныштымыз» — дейді Октавиан Бивол.
Біріккен Ұлттар Ұйымының Балалар Қоры (United Nations International Children’s Emergency Fund) – балалар мен жастардың құқықтары мен әл-ауқатын қамтамасыз ету мақсатында Біріккен Ұлттар Ұйымының қамқорлығымен жұмыс істейтін халықаралық ұйым.
