Оралда ерекше қажеттіліктері бар балаларға арналған жаңа әлеуметтік орталық ашылды. Орталықта ата-аналар медициналық-әлеуметтік қызметтің барлық түрін бір жерден ала алады. «Ақ ниет» жартылай ауруханасы пилоттық режимде әлеуметтік қызмет көрсететін болады, деп хабарлайды.
Жаңа орталықта тірек-қимыл аппараты бұзылған және психоневрологиялық дертке шалдыққан балалар ем қабылдайды. Арнайы қызмет көрсету орталығы қазірдің өзінде 5 кішкентай науқасты қабылдады. Қазір олармен психологтар, логопедтер, дефектологтар жұмыс істейді. Балаларға емдік терапия мен массаж бөлек көрсетіледі.
Наиля Терницкая, Орал қаласының тұрғыны:
— Сабаққа бір жаққа, емделуге басқа жаққа барамыз, күні бойы баламмен бірге боламын. Мұндай үйді ашқаны өте ыңғайлы болды. Бала таңертеңнен кешке дейін осында болады. Бұл ретте баланы таңертең автобуспен осы үйдің мамандары алып кететіні өте қолайлы. Ал кешке үйге дейін жеткізіп береді. Баламыз сөйлей бастайды деген үмітіміз бар, әрине бұл орталықтан үмітіміз көп.
Арнайы қызмет көрсету орталықтарын ашу бойынша осындай пилоттық жоба еліміздің 7 облысында жүзеге асырылуда. Олардың әрқайсысы ерекше қажеттіліктері бар 100-ге жуық балаға көмек көрсетеді. Облыста барлығы 7 балаларға арналған орталық, сондай-ақ 19 үйде әлеуметтік көмек көрсету бөлімі бар.
Миргүл Құрманбаева, облыстық жұмыспен қамтуды үйлестіру және әлеуметтік бағдарламалар басқармасының бөлім басшысы:
— Алдағы уақытта Әлеуметтік кодекске сәйкес, «Балапан» бағдарламасы бойынша әлеуметтік қызмет көрсету жүйесін ірі пансионаттардан көшіру жоспарлануда. Арнайы әлеуметтік қызмет көрсету үшін ірі мектеп-интернаттар шағын орталықтарға айналады. Батыс Қазақстан облысында 3 мыңға жуық ерекше қажеттіліктері бар бала бар. Олардың барлығына Инватакси сияқты қызметтер мен иппотерапия сияқты емдеу қажет. Бұл жерде Әлеуметтік кодекстің күшіне енуі үлкен көмек болды. Бұл мүмкіндігі шектеулі балаларды қолдау шараларын жақсартуға мүмкіндік берді.
Миргүл Құрманбаева, облыстық жұмыспен қамтуды үйлестіру және әлеуметтік бағдарламалар басқармасының бөлім басшысы:
— Ата-аналарға немесе заңды өкілдерге санаториялық-курорттық емделуге берілетін кепілдендірілген сома 70 пайызды құрайды. Облысымызда биыл иппотерапия қызметіне мемлекеттік әлеуметтік тапсырыс ашылды. Бүгінгі күні бұл қызмет түрімен 67 бала қамтылған. Сонымен қатар біз жеке такси қызметін көрсетеміз. Бұл қызмет 11 аудан мен Орал қаласында көрсетіледі. Бұл ретте келесі жылы облыс орталығында жаңа сауықтыру орталығы есігін айқара ашады. Одан кейін мүмкіндігі шектеулі жандар облыстан шықпай-ақ емделіп, түрлі әлеуметтік қызмет түрлерін ала алады.
