Қостанайда мүгедектігі бар жандарды әлеуметтік қолдау ұлғайтылды
2024 жылдың 1 қаңтарына жұмыспен қамту бөлімінде есепте тұрған мүгедектігі бар жандардың саны 8380 адамды құрайды, оның 1042-сі балалар.
2023 жылы мүгедектігі бар жандарды әлеуметтік қолдауға барлығы 1 213 миллион теңге бөлініп, игерілді, 2024 жылы бұл сома 1 564,5 миллион теңгені құрайды.
Жұмыспен қамту және әлеуметтік бағдарламалар басқармасы ерекше қажеттіліктері бар қыздар мен ұлдардың әлеуметтену деңгейін арттыру бойынша жұмыстар жүргізіліп жатқанын түсіндірді. Бұл ретте олар техникалық көмекші (компенсаторлық) құралдармен, жеке көмекшінің және ымдау тілі маманының қызметтерімен қамтамасыз етіледі.
– Бөлім тарапынан қаржылай көмек көрсету жұмыстары да жүргізілуде. 2023 жылы үйде оқитын 229 мүгедектігі бар балаға қаржылай қолдау көрсетуге 46,4 миллион теңге бөлініп, игерілді, 2024 жылға арналған сома 6 пайызға ұлғайтылып, 49,2 миллион теңгені құрады (185 баланы қамту жоспарланған), жұмыспен қамтуға баса назар аударылды.
