ҚР Еңбек және халықты әлеуметтік қорғау министрлігінің кеңейтілген алқа мәжілісінде ведомство басшысы Светлана Жақыпова биыл Қазақстанда Инклюзивті саясат тұжырымдамасы қабылданатынын мәлімдеді.
Еңбек және халықты әлеуметтік қорғау министрлігі мүгедектігі бар адамдарды әлеуметтік оқшаулаудың, кемсітушіліктің, инфрақұрылымның жеткіліксіз қолжетімділігінің, еңбек нарығындағы тең емес мүмкіндіктердің, арнаулы әлеуметтік қызметтердің төмен сапасының және т. б. өзекті мәселелерді шешу үшін қолданыстағы жүйені жетілдіру және цифрландыруды барынша енгізу бойынша кешенді жұмыс жүргізуде.
«Сонымен, 2024 жылы Инклюзивті саясат тұжырымдамасы әзірленіп, қабылданады. Оның басты мақсаты – әрбір азаматтың жеке даму ерекшеліктеріне қарамастан лайықты өмір сүруге және өз әлеуетін іске асыруға мүмкіндігі бар қоғам құру», – деді Светлана Жақыпова.
Өткен жылы халықты әлеуметтік қорғау жүйесін жетілдіру шеңберінде арнаулы қызметтерді көрсету жүйесін өзгерту бойынша жұмыс басталды, оған мыналар кіреді:
— арнайы қызметтер көрсету орталықтарының бюджетін шоғырландыру;
— жан басына шаққандағы қаржыландыруға көшу;
—жаңа стандарттарды қабылдау және әлеуметтік қызмет көрсету орталықтарының қызметін цифрландыру.
2023 жылы Қарағанды және Шығыс Қазақстан облыстарында пилоттық жоба іске қосылды.
Министрлік техникалық оңалту жабдықтары мен қызметтерінің жекелеген түрлерін монетизациялау мәселесін қарастыруда. Бірінші кезеңде ортопедиялық аяқ киім және гигиеналық құралдармен қамтамасыз етуді монетизациялау қарастырылады.
«Бүгінде жергілікті атқарушы органдардың алдында барлық нысандардың қолжетімділігін Интерактивті картаға енгізу және оларды жүріп-тұруы шектеулі адамдардың қажеттіліктеріне бейімдеу шараларын қабылдау міндеті тұр», — деді министр.
Оңалту іс-шараларының тиімділігін бақылау және арттыру мақсатында сандық оңалту күнделігін әзірлеу жоспарлануда.
Бүгінгі таңда Денсаулық сақтау министрлігінің қолдауымен Астана медициналық университетінде әлеуметтік және кәсіби оңалтудың цифрлық хаттамалары әзірленді, оларды енгізу әлеуметтік қызмет көрсету сапасын арттыруға мүмкіндік береді.
Әлеуметтік саланы дамытудың бірінші ұлттық ғылыми орталығын жаңғырту аясында мүгедектігі бар адамдарды табысты және тиімді оңалту мақсатында жаңа технологияларды әзірлеу бойынша жеке зертханалар жұмыс істейтін болады.
«Біз протездік-ортопедиялық саланы, есту-сөйлеуді оңалтуды өзгерту, әдістемелік орталық құруды, сондай-ақ әлеуметтік қызметкерлердің кәсіби стандарттарын қарастырамыз. Күтілетін нәтиже – мүгедектігі бар жандардың өмір сүру сапасының жақсаруы», — деп түйіндеді сөзін Светлана Жақыпова.
