Қазақстанда ерекше қажеттіліктері бар және әлеуметтік осал санаттағы 180 жастар өкілін AI маманы, no code әзірлеуші, UI/UX + Web маманы сынды нарықта сұранысқа ие цифрлық кәсіптерге оқытады.
«OrleTECH 3.0» жобасының курстары қазақ және орыс тілдерінде әзірленді, сондай-ақ есту қабілеті бұзылған жастар үшін ым-ишара тіліне бейімделген.
Жоба «Samruk-Kazyna Trust» қоры және «Шелл Қазақстан БВ» компаниясының қолдауымен жүзеге асырылуда.
Жоба кешенді түрде кезең-кезеңімен дамытуды қамтитын офлайн және онлайн форматтағы іс-шаралардан тұрады. Әлеуметтік дағдыларды дамыту үшін 3 күндік soft skills офлайн-лагері, таңдалған бағыт бойынша 3 айлық онлайн-курсты өткізу жоспарлануда, ал үшінші кезеңде қатысушылардың жұмыспен қамтылуына жәрдемдесу көрсетіледі.
Осы жоба шеңберінде және адами капиталды дамыту саласындағы жобаларды іске асыру мақсатында бүгін Астанада «Samruk-Kazyna Trust» және «Шелл Қазақстан БВ» арасында ынтымақтастық туралы меморандумға қол қойылды.
Шараға «Самұрық-Қазына» АҚ Басқарма төрағасы Нұрлан Жақыпов пен «Шелл Қазақстан БВ» аға вице-президенті және концерннің төрағасы Херман Бурмайстер қатысты. Келісім аясында екі жақтың қатысуымен жаңа жобаларды әзірлеумен, жобаларды іске асыру салаларды айқындаумен айналысатын, ақпараттық және әкімшілік қолдау көрсететін жұмыс тобы құрылады.
2023 жылы «Samruk-Kazyna Trust» қоры арқылы 7,2 млрд теңгеге 46 әлеуметтік маңызы бар жоба жүзеге асырылды. Осы жобалар аясында 524 мың қазақстандық қайырымдылық көмекпен қамтылды.
