Оқушылар мен ата-аналарға тегін психологиялық кеңес беру үшін қаланың бес ауданында кабинеттер ашылды. Бұл туралы РСК брифингінде Астана қаласы Білім басқармасының басшысы Қасымхан Сенғазиев айтты.
Оқу кабинеттері қаладағы «Ұстаздар үйі» әдістемелік орталығы, №22, №54, №88 мектептер негізінде құрылған.
«2024 жылдың басынан бері 336 бала мен 377 ата-ана консультациядан өтті. Қазіргі таңда қалалық Психологиялық қолдау орталығын ашу жұмыстары жүргізілуде. Орталықта диагностикалық, коррекциялық-дамытушылық, консультативтік, психопрофилактикалық қызметтер көрсетіледі», — деді басқарма басшысы.
Бүгінде елордадағы білім беру ұйымдарында бұзақылыққа қарсы бағдарлама жүзеге асырылуда.
Осы мақсатта пилоттық жобаға 5 мектеп енгізілді (Алматы ауданындағы №72 мектеп, Байқоңыр ауданындағы №16 мектеп, Нұра ауданындағы №79 мектеп, Есіл ауданындағы №24 мектеп, Сарыарқа ауданындағы №6 мектеп).
«Осы бағдарлама аясында қорлаудың алдын алу және азайту және анықталған буллинг жағдайларын шешу бойынша шаралар қабылданатын болады. Сондай-ақ мұғалімдерді оқушылардың мазасыздану дәрежесін анықтау дағдыларына үйрету жоспарлануда. Ал оқушылар арасындағы бұзақылықтың алдын алу мақсатында Білім министрлігінің «ДосболLike» бағдарламасы елорданың бес мектебінде (№ 4, 24, 25, 72, 74) пилоттық режимде жүзеге асырылуда», — деді Қасымхан Сенғазиев.
