Қарағанды облысында риэлторлар зейнеткерлердің пәтерлерін қорқытып, зорлық көрсетіп қайта рәсімдеулер жасаған
Ішкі істер министрлігінің мәліметінше Қарағанды облысында 14 пәтерді «қара ниетті риэлторлар» тартып алған.
Қылмыстық әрекет үстіміздегі жылдың мамыр айында тоқтатылды. Топ құрамында қорқыту және күш қолдану арқылы мүлікті, оның ішінде зейнеткерлердің, мүгедектігі бар жандардың және алкогольдік, нашақорлық тәуелділіктері бар азаматтардың пәтерлерін заңсыз қайта рәсімдеген адвокаттар және нотариус болған. Қылмыстық топтың белсенді қатысушыларының бірі – деструктивті діни ағымды жақтаушы тұлға болған.
«13 мамырда жедел-іздестіру шаралары барысында әртүрлі жылжымайтын мүлік объектілерінің құжаттары мен жеке тұлғалардың жеке мәліметтері алынды. Қылмыстық топтың барлығы 28 мүшесі ұсталды. Аталмыш топтың осыған ұқсас қылмыстарға қатысы бар-жоғын анықтау мақсатында тексеру жүргізілуде. Әсіресе аса ірі көлемдегі алаяқтық бабы бойынша тергеу амалдары жүргізілуде», — дейді ІІМ Ұйымдасқан қылмысқа қарсы күрес департаментінің өкілі Қуандық Алпыс.
