ҚР Денсаулық сақтау министрлігі дәрі-дәрмекке баға белгілеу тетігін қайта қарауда
Қазақстан Республикасының Денсаулық сақтау министрлігі пациенттердің, мемлекеттің және өндірушілердің мүдделерін ескере отырып, дәрілік заттарға баға белгілеу тетігін қайта қарауда. Тәуекелге негізделген тәсілді қолдана отырып, дәрілік заттардың сапасын бағалау мен таңдауға және фармацевтикалық өнімдерді импорттау тәртібіне өзгерістер енгізілуде. Фармацевтика және медицина саласын дамыту жөніндегі ведомствоаралық комиссия құрылды, оның құрамына мемлекеттік органдардың, «Атамекен» ҚР ҰКП, үкіметтік емес ұйымдар мен бизнес-қоғамдастықтардың өкілдері кіреді.
2024 жылдың наурыз айында стратегиялық ұсыныстарды әзірлеуге жауапты мамандандырылған бөлім құрылды. Сатып алу тиімділігін арттыру үшін Бірыңғай дистрибьютор жарамдылық мерзімін ескере отырып, тауарларды жоспарлау мен бөлуді автоматтандыратын ақпараттық жүйені енгізді. Бұл есептен шығарылатын дәрілердің санын азайтады.
Бірыңғай дистрибьютордың қызметі өндірушілермен тікелей келісімшарттар жасасуға бағытталатын болады, бұл делдалдарды жою арқылы дәрілік заттардың бағасын төмендетуге мүмкіндік береді. Қызметтік тексеру барысында жүйелік кемшіліктер мен тиісті бақылаудың жоқтығы анықталды, нәтижесінде Министрліктің жауапты департаменттері мен ведомстволық бағынысты ұйымдарының негізгі басшылары қызметтерінен босатылды.
Қабылданған шаралар Қазақстан халқын қауіпсіз және сапалы дәрілік заттармен және медициналық бұйымдармен қамтамасыз етуге, сондай-ақ отандық өндірушілерді қолдауға бағытталған.
2024 жылдың бірінші тоқсанында Қазақстан Республикасының Жоғары есеп палатасы Қазақстан Республикасы Денсаулық сақтау министрлігі мен оның ведомстволық бағыныстағы ұйымдарының 2022-2023 жылдарға арналған қызметіне аудит жүргізіп, дәрілік заттар мен медициналық мақсаттағы бұйымдардың бағасын белгілеуді, сатып алуды, материалдық-техникалық қамтамасыз етуді, тексеруді және қауіпсіздігін бағалауды реттейтін заңнамадағы кемшіліктерді анықтайтын бірқатар жүйелік көрсеткіштерді анықтаған болатын.
Анықталған бұзушылықтарды жою үшін Жол картасы әзірленіп, бекітілді.
