Денсаулық сақтау министрі Ақмарал Әлназарова қазақстандық фармацевтикалық компаниялар мен ірі дистрибьюторлардың өкілдерімен 2025 жылға арналған дәрілік заттар мен медициналық мақсаттағы бұйымдарды сатып алу мәселелері бойынша кеңес өткізді.
Ведомство басшысы денсаулық сақтау шығындары еліміздің әлеуметтік-экономикалық саясатының негізгі көрсеткіші екенін атап өтті.
«Мемлекет барлық азаматтардың медициналық көмек пен дәрі-дәрмекке қолжетімділігін қамтамасыз етуге күш салуда. Сатып алу науқанын бастамас бұрын, өндіруші белгілеген дәрілік заттардың бағасы қолайлы және қолжетімді екеніне көз жеткізу керек. Бұл ретте жергілікті дистрибьюторлардың бағасы регрессивті бағалар шегінде қалуы тиіс».
«СК-Фармация» ЖШС мәліметінше, Бірыңғай дистрибьютор сатып алуды ұзақ мерзімді келісімшарттар, тікелей келісімшарттар, халықаралық ұйымдар және тендерлер арқылы жүзеге асырады. Тендер және отандық тауар өндірушілермен ұзақ мерзімді келісімшарттар арқылы сатып алу үлесі 88 пайызды құрайды.
Конкурстық рәсімдердің нәтижесінде өткен жылы 21,5 млрд теңгеге жуық қаржы үнемделсе, үнемделген қаржы 50 млрд теңгеге дейін ұлғайтылды. Дегенмен, генерикалық немесе биосимилярлық препараттардың бағасы бастапқы препараттардың құнынан асып түсетін жағдайлар бар. Министрлік мұндай жағдайларды жою және баға жүйесін жетілдіру жұмыстарын жалғастыруда.
Сатып алудағы отандық өнімнің үлесін арттыру үшін 10 жылға дейінгі мерзімге ұзақ мерзімді шарттар жасасуға қолдау көрсету шарасы қарастырылған. Дегенмен, барлық өндірушілер мен дистрибьюторлар жеңілдіктер ұсынбайды.
Денсаулық сақтау министрі фармацевтикалық компаниялардың өкілдерін әлеуметтік жауапкершілікті көрсетуге және бағаны төмендетуге қайта қарауға шақырды.
Агенттік сатып алу процесін оңтайландыру және барлық азаматтар үшін дәрі-дәрмектің қолжетімділігін қамтамасыз ету бойынша жұмысты жалғастыруда.
