Алматыда 2024 жылы әлеуметтік осал санаттағы оқушыларға берілетін материалдық көмек көлемі 55 мың теңгені құрайды, деп хабарлады қалалық білім басқармасының баспасөз қызметі.
Төлем киім-кешек пен оқу құралдарын сатып алуға арналған және оның ең төменгі мөлшері ең төменгі күнкөріс деңгейінен, яғни 43 407 теңгеден төмен болмауы керек.
Қазақстанның барлық аймақтарының ішінде ең көп көмекті Алматы қаласы бөліп отыр. Ақша келесі санаттағы білім алушыларға киім, аяқ киім және кеңсе тауарларын сатып алуға жұмсалады:
• Атаулы әлеуметтік көмек (АӘК) алуға құқығы бар отбасы балалары;
• АӘК алмайтын, бірақ табысы күнкөріс деңгейінен төмен отбасылардың балалары;
• Отбасында тұратын жетім және ата-анасының қамқорлығынсыз қалған балалар;
• Төтенше жағдайларға байланысты шұғыл көмекке мұқтаж отбасылардың балалары;
• Қиын өмірлік жағдайдағы отбасы балалары;
• Мүмкіндігі шектеулі балалары бар отбасылардың балалары;
Көмек алу үшін мектепке барып өтініш беру керек. Ата-ананың несиелік қарызы жоқ және бұғатталмаған шоты (20 таңбалы банк картасының нөмірі) болуы керек.
