Жетісу мұғалімдері мүгедектігі бар балаларға өткізілмеген сабақтар үшін жалақы алды
Талдықорған қаласының прокуратурасы мүмкіндігі шектеулі балаларға инклюзивті білім беру саласындағы заңнаманың сақталуына талдау жүргізді.
Инклюзивті білім беру – бұл барлық балалардың физикалық, психикалық, мәдени немесе әлеуметтік-экономикалық деңгейіне қарамастан, сапалы білім алуға тең қолжетімділігі бар білім беру жүйесіне деген көзқарас.
«Прокурорлар 261 мүмкіндігі шектеулі бала стационарлық емделу кезінде инклюзивті білім алмағанын анықтады. Осыған қарамастан мұғалімдерге 2 251 833 теңге жалақы төленді», — деп хабарлады Жетісу облыстық прокуратурасы.
Бұрын білім алмаған балалар оқу үдерісіне қайта енгізіліп, қажетті дайындықтан өткені хабарланды.
«Осылайша прокуратура кәмелетке толмағандардың құқықтарын қорғайды. Сондай-ақ мемлекет кірісіне 2 251 833 теңге өтелді», — деп хабарлады қадағалау органы.
