Елорданың Байқоңыр ауданында халықтың әлеуметтік осал топтарынан шыққан балаларға арналған «Ұрпақтар арасындағы сабақтастық» қайырымдылық акциясы өтті, деп хабарлайды Астана әкімдігінің ресми сайты.
«Белсенді ұзақ өмір сүру орталығы» Байқоңыр ауданы әкімдігімен бірлесе отырып, «Өндіріс» дене шынықтыру-сауықтыру кешенінде спорттық шеберлік сабақтарын, арқан тарту және асық атудың ұлттық ойындарын өткізіп, қалпына келтіру гимнастикасының жаттығуларын көрсетті.
«Бүгінгі іс-шара балаларға спортпен шұғылданудың маңыздылығын көрсетті. Аға буын өкілдерімен өткізілген шеберлік сыныбы мен түрлі ойындар кішкентай бүлдіршіндерімізге дұрыс үлгі көрсетті. Балаларға дайындалған сыйлықтар салауатты өмір салтына мотивация болады», — дейді Байқоңыр аудандық әлеуметтік сала бөлімінің басшысы Тұртаев Жанболат.
Іс-шараға 82 жастағы спорт шебері, бокстан Қазақстан Республикасының еңбек сіңірген жаттықтырушысы Айсұлтан Жақыпбек қатысты. Ол балаларға бокстан шеберлік сыныбы мен тренинг өткізді.
Мереке соңында балаларға Байқоңыр ауданы әкімдігі түрлі сыйлықтар табыс етті.
