Жұмысшы мамандықтары жылы: Астана қаласында жастарды жұмысқа орналастыруға жәрдемдесу
Астана коммуникациялар қызметінде өткен брифингте Еңбек ұтқырлығы орталығының директоры Олжас Омар жұмыссыз азаматтарға, жоғары оқу орындарының түлектеріне және жұмыс берушілерге берілетін жаңа мүмкіндіктер мен қолдау шаралары туралы айтты, деп хабарлайды елорда әкімдігінің ресми сайты.
Спикердің айтуынша «Жұмысшы мамандықтары жылы» аясында жастарға кәсіптік бағдар беру және жұмыс берушілердің кадр даярлау үдерісіне белсенді қатысуы басты назарда болды.
Осы мақсатта 9 және 11-сынып түлектеріне кәсіби кеңестер беріліп, сұранысқа ие мамандықтарды таңдауда көмек көрсетіледі.
«Өндіріс саласында жұмыс істейтін мамандарды қолдау шаралары қабылдануда. Колледждерде «біліктілікті дамыту фабрикасы» форматындағы ресурстық орталықтар ашылып, «Жұмыс беруші күні» жобасы іске қосылды. Бос жұмыс орындары жәрмеңкелері де ұйымдастырылды. Биыл Астанада мемлекеттік бағдарлама аясында 20 мыңнан астам адам қамтылса, оның 12 мыңы жастар болды.
IT саласындағы кәсіби біліктілікті тегін растау. Қазіргі таңда цифрлық экономиканың қарқынды дамуына байланысты ақпараттық технологиялар саласында жұмыс істеуге ниет білдірген мамандар саны артып келеді. Осыған орай «Мансап еңбек» платформасы арқылы кәсіби біліктілікті тегін растауға мүмкіндік беретін ваучерлік жүйе іске қосылды. Осы бағдарлама аясында желілік әкімші, жүйелік талдаушы, ақпаратты қорғау инженері және басқа да сұранысқа ие АТ мамандықтары бойынша сертификаттар алуға болады», – дейді Олжас Омар.
Бағдарлама қалай жұмыс істейді?
1. Еңбек ұтқырлығы орталығы мамандық таңдауды ұсынады.
2. Өтінім «Мансап Еңбек» платформасы арқылы электрондық цифрлық қолтаңбаны пайдалана отырып беріледі.
3. Сіздің өтінішіңіз мақұлданғаннан кейін ваучер сіздің жеке кабинетіңізде қолжетімді болады.
4. Үміткер емтихан тапсырады және кәсіби біліктілігін растайтын сертификат алады.
«Қазақстанда колледждер мен университет түлектеріне арналған жастар тәжірибесі бағдарламасы жүзеге асырылуда. Бұл бағдарлама жас мамандарға алғашқы жұмыс тәжірибесін алуға мүмкіндік береді. Бағдарлама шарттарына сәйкес, жастар тәжірибесінің ұзақтығы 12 айға дейін, жалақысы 117 960 теңге, қатысушылардың жасы 35 жастан аспауы тиіс. Өткен жылы 3353 жұмыс орнына 567 жұмыс беруші өтініш білдірсе, қазіргі таңда бітірушілер үшін 3319 бос жұмыс орны бар.
Сонымен қатар студенттер үшін практикалық сабақтар мен тәжірибелерді аяқтау процесі қазір оңайырақ және қолжетімді болды. Enbek.kz порталы жұмыс берушілерге студенттер мен интерндерді оңай табуға мүмкіндік береді. Ол үшін алдымен Enbek.kz сайтына тіркеліп, «кәсіби тәжірибе» белгісімен бос жұмыс орнын жариялау қажет. Содан кейін жұмыс беруші студенттерді таңдап, әңгімелесуге шақыра алады. Келесі кезеңде студент өндірістік тәжірибеден өтетін оқу орнымен онлайн келісім-шарт жасалады. Жұмыс беруші интерннің электронды күнделігін жүргізеді және оның нәтижелерін бақылайды. Бұл жүйе студенттерге алғашқы жұмыс тәжірибесін алуға, ал жұмыс берушілерге болашақ мамандарды дайындауға мүмкіндік береді», — дейді Еңбек ұтқырлығы орталығының директоры.
Сонымен қатар мемлекет жұмыс берушілердің сұраныстарына сәйкес жұмыссыз азаматтарды тегін кәсіптік оқыту бағдарламасын ұсынады. Бағдарлама 1 айдан 6 айға дейін созылады. Студенттер 43 574 теңге шәкіртақы және 7 864 теңге материалдық көмекпен қамтылған.
Оқыту жұмыссыз азамат, жұмыс беруші, оқу орны және Еңбек ұтқырлығы орталығы арасында жасалған төрт жақты келісімшарт негізінде жүзеге асырылады. Бағдарламаға тұрақты салық төлеуші болып табылатын, жалақы бойынша берешегі жоқ және жұмыс істегеніне 1 жылдан кем емес кәсіпорындар қатыса алады. Өтініштер Enbek.kz порталындағы «Кәсіптік оқыту» бөлімінде қабылданады.
