Мемлекет басшысы Адам құқықтары жөніндегі уәкілдің Астанадағы өкілі Баян Жалмағанбетованы қабылдады.
Кездесу барысында адам құқықтарын қорғау, оның ішінде мүмкіндігі шектеулі жандарға қолайлы жағдай жасау мәселелері талқыланды.
Баян Жалмағанбетова Мемлекет басшысына құқық қорғау саласындағы жағдай туралы баяндап, бірқатар ұсыныстар айтты.
Мемлекет басшысы 2023 жылдың желтоқсанында адам құқықтары мен заңдылықты қамтамасыз ету саласындағы іс-шаралар жоспары туралы арнайы Жарлыққа қол қойғанын еске салып, осы құжатты тиімді жүзеге асырудағы Адам құқықтары жөніндегі уәкіл мен оның өкілдерінің басты рөлін атап өтті.
Осы тұрғыда Қасым-Жомарт Тоқаев Баян Жалмағанбетоваға белсенді азаматтық ұстанымы үшін алғыс айтып, оның елордадағы қызметі өзге өңірлерге үлгі болатынын, бұл оған ерекше жауапкершілік жүктейтінін атап өтті.
Мемлекет басшысы мүгедектігі бар жандардың мәселелерін шешу үшін әкімдікпен және министрліктермен ынтымақтастықты нығайтудың, сондай-ақ үкіметтік емес ұйымдармен өзара іс-қимылды дамытудың маңыздылығын атап өтті.
